मनशून्य

शून्य

****

मनाच्या गाभारी प्रगटले शून्य 

जन्म प्रश्नचिन्ह पांघरले ॥१

मोडले पडले इमले बांधले 

स्वर्गावरी गेले स्वप्न वेडे ॥२

वात ना प्रकाश रूप ना आकाश 

शब्दांचा प्रवास ठोठावला ॥३

नुरले मागणे नुरले रडणे 

भव भुता भेणे नसलेल्या ॥४

उरले केवळ रूप गुण उणे 

मी पण असणे सर्ववत ॥५

माझ्यात शून्य शून्यात वा मी 

वाहणे ते कर्मी घडू आले ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

कर्म

कर्म 

****

कर्मात गुंतला काय व्यवहार 

अनंत अपार जीवनाचा 

कर्मातून कर्म घडतसे जन्म 

दिसे अंतहीन प्रवास हा

थांबू म्हणूनही थांबता येईना 

उतार माईना डोळीयात 

मग अनुचित अथवा उचित 

आपल्या हातात एवढेच 

मज कर्मफळ गमे काल्पनिक 

चालविण्या लोक नीतीवर 

कुणा कळे जन्म आणिक मरणे

आगा हे वाहणे प्रवाहात

तरीही घडावे जगणे सुंदर 

उदात्त उदार प्रेममय

स्वर्ग आशेविन नर्क भयाविन 

जन्म फळाविन काल्पनिक

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

मठ

मठ

****

दिसतात मठ कुठे मोक्यावर 

माई तटावर बांधलेले ॥ १

पेरलेले शेत मग्न उत्पन्नात 

पोटार्थी महंत किती एक ॥२

सुरेख सुंदर सजले मंदिर 

जन धनावर पराधीन ॥३

करती पूजन करती यजन 

व्यवहारी मन रमलेले ॥४

सुटते ना पोट नच सुटे छत

 सुरक्षेचे तट देहाचे या ॥५ .

काय तो वाईट आहे रे संसार 

जीवन स्वीकार असलेला ॥६

विक्रांत पाहतो असाही पसारा 

मायेची ही तऱ्हा विलक्षण ॥ ७

आणि चाले पुढे आपुलिया वाटे 

चुकवित काटे मुकाट्याने ॥८

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

समाधान

समाधान

*******

असे समाधान थेँब अमृताचा 

प्राण साधनेचा साधकाच्या ॥१

समाधानाविना येथे येते न रुजून 

ध्यान हे सजून अंतरंगी ॥२

शांती तयाचे रे असे बाह्यरंग 

देखतसे जग डोळ्यांनी ॥३

आणिक ती दया येते ओघळून 

समाधानातून सर्वाभुती ॥४

सांगती श्री गुरु खूण अंतरीची 

वाट साधनेची शिष्यालागी ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

जगदीश महाराज (झगडीया मढी)

जगदीश महाराज  (झगडीया मढी)

 नर्मदाकाठच्या कविता

***************************

निर्मळ डोळ्यांचा मधुर वाणीचा 

नर्मदा तीरीचा साधू एक ॥१

जरी भला मोठा मांडला पसारा 

नव्हता रे वारा अहंकारा ॥२

पुसे एकेका येऊन कुशल 

आग्रह प्रेमळ शब्दांमध्ये ॥३

जणू जंगलात मधुर रसाचा 

तरू हा फळांचा भरलेला ॥४

जणू वाटेवर वृक्ष चंदनाचा 

शितल छायेचा श्रमल्यांना ॥५

पुत्र नर्मदेचा भेटला मायेचा 

स्पर्श माहेरचा मना झाला ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

मन

मन

.****

मनातून मन वजा होत नाही 

आणि जन्म वाही जीवनाला ॥१

धनामागे मन देवद्वारी मन 

शोधे कणकण सुखाचाच ॥२

अस्थिर अभंग मनाचे तरंग 

बदलती रंग क्षणोक्षणी ॥३

कधी विलक्षण पाहून भोगून 

जाते हरपून मन वेडे ॥४

तेच विलोपन शून्य आठवून 

भोगू पाहे क्षण त्याच रीती ॥५

मना न कळते तेव्हा ते नव्हते 

आनंदच होते शब्दातीत ॥६

तेव्हा जे कळते मना जे दिसते 

अरे ते नसते शोधलेले ॥७

विक्रांत मनाचे पाहतो नर्तन

अतळ जाणून अस्तित्वास ॥८

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

विठ्ठल दर्शन आषाढी

विठ्ठल दर्शन (आषाढी)

*****************

पाहिला मी देव उभा विटेवर 

सावळा सुंदर मनोहर

पाहिला ना वेष नच वा मुकुट 

चंदनाचा नीट गंध उभा 

पाहिले न हार नच वा पुजारी 

कमान रुपेरी समोरील 

मुखावर डोळे होते खिळलेले 

शब्द विरलेले मनातील 

आले न मागणे काहीच सांगणे 

एक शून्य गाणे भरलेले 

होते खेचणारे जरी ओढणारे 

पापण्यांची दारे मिटली ना 

युगांची तहान मिटली वाढली 

स्पर्शा न कळली पदावर 

विक्रांता कळेना काय ते घडले 

शब्द न उरले सांगावया

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️