गुरुवार, ३१ ऑक्टोबर, २०१९

रिता घट





विक्रांत रिता हा
घट काठावर
असे अहंकार
भरलेला

उचल दयाळा
लावी रे धारेला
आदळी तयाला
इथे तिथे

भरावा बुडून
अथवा फुटून
जावा हरवून
चैतन्यात

भरल्या वाचून
घट जन्म व्यर्थ
त्याला नच अर्थ
काही इथे

भरणे बुडणे
फुटणे वाहणे
अवघे घडणे
तुझ्या हाती 




© डॉ..विक्रांत प्रभाकर तिकोणे
http://kavitesathikavita.blogspot.in

चंदने सिस्टर



सरिता चंदने सिस्टर
*************
कसे वागावे
कसे बोलावे
कसे जगावे
हे सारे शिकावे
ते चंदने सिस्टराकडून

आपण कोण आहोत
काय करीत आहोत
का करीत आहोत
यांचे सदैव भान
कसे ठेवावे हे शिकावे
ते चंदने सिस्टरांकडून

कुणी मानो या ना मानो
कोणा आवडो वा न आवडो
एक आदर्श सिस्टर
एक आदर्श सिस्टर इन्चार्ज
कशी असते कशी असावी
ते शिकावे चंदने सिस्टराकडून

एखादी व्यक्ती एकाच वेळी
दरारा ठेवून अत्यंत प्रेमाने
कशी बोलू शकते
शांत राहू शकते
याचे मला नवल वाटते ,खरेच
ते शिकावे चंदनी सिस्टराकडून

चंदने सिस्टर स्टाफ का झाल्या
याचे मला अगोदर नवलच वाटायचे
परंतु त्या पाठीमागची कथा
त्यांनी जाणून बुजून घेतलेला
हा सेवा करण्याचा वसा
जेव्हा मला कळला
जेव्हा त्यांनी मला सांगितला
तेव्हा त्यांच्याबद्दलचा
मला वाटणारा आदर
अधिकच वाढला

पण त्या जर
हि वाट चुकल्या असत्या
तर आम्ही नक्कीच मुकलो असतो
एका छान व्यक्तिमत्त्वाला
उत्कष्ट स्टाफ ला
पण तर मग त्या असत्या
एखाद्या मॅनेजिंग डायरेक्टरच्या पदाला
आकाशाला भिडलेल्या
हे नक्कीच

सिस्टर बरोबर कॅज्युलिटी पासून
काम करित असतांना जाणवले
त्यांना असलेले या विषयाचे सखोल ज्ञान
रुग्णांबद्दल प्रचंड सहानुभूती
आणि आपण महानगर पालिके सारख्या
संस्थेत काम करीत आहोत हि जाणीव
त्यांच्या मर्यादेचे भान
यांना सतत असते

आपण करीत असलेल्या
कृतीमागील शास्त्र
त्यात अंतर्भूत असलेले तत्त्वज्ञान
यांच्या मनात अगदी स्पष्ट असते
तिथे अजिबात शंका नसते

मला त्यांची काही
थोडीफार वैयक्तिक  माहिती आहे
त्यानुसार त्या एक आदर्श मुलगी
आदर्श पत्नी
आदर्श माता
आदर्श सून आहेत
कळत वा नकळत
हे आदर्शवत होण्याचे वेड
हा वसा त्यांना
त्यांच्या आई वडिलांकडून मिळाला आहे
त्यांना जसे हे वेड लागले
तसेच अापना सर्वांना लागो
अन् हे रसरशीत जीवन
पूर्णपणे जगण्याची ती प्रेरणा
आपल्यालाही मिळो
हीच प्रार्थना


© डॉ..विक्रांत प्रभाकर तिकोणे
http://kavitesathikavita.blogspot.com

बुधवार, ३० ऑक्टोबर, २०१९

तपशीलात दत्त


तपशीलात दत्त
************
तपशीलात दत्त माझा
कधीच शिरत नाही
तू काय खातो पितोस
असे कधी विचारत नाही 
.
सोवळ्याच्या घरी सोहळ्यात
बसे मखमली कपड्यात
ओवळ्याच्या घरी ओवळ्यात
बसे विटक्या फडक्यात
.
राहतो कुठेही आनंदाने
प्रेमे ऐकतो माझे गाणे
तूप साखर कांदा भाकर
घेतो भोज कौतुकाने
.
हे सारे वरचे पसारे
असतो जाणून पुरतेपणी
त्या काहीच नको असते
श्रद्धा आणि भक्ती वाचूनी
.
असा देव ओळखला
ह्रदयाशी  दृढ धरला
जन्म हरखून विक्रांत
मग दत्ता खेळी रंगला
**

 © डॉ.विक्रांत प्रभाकर तिकोणे
https://kavitesathikavita.blogspot.com

ती...






ती...
***
कळल्यावाचून जीवन तिला
कसे जगणे चालले वाहून  
काय तिच्या आयुष्याचा
साराच धूर गेलाय होवून  

कुणाशीच मैत्र नव्हते
कुणाशीच सख्य कधी
बेपर्वा बेदरकार एकटी 
असून भोवताली गर्दी 

इतके कडवट का रे देवा
कुणा असा घडवतोस
देहावरती काटे त्यांच्या
अन जगाही रडवतोस

तुटलेली स्वप्न सारी
सुटलेले धागे दोरे
धार अशी धाग्याला
जमलेले जखमी सारे

त्या तिच्या शब्दातून
जहर सदा उकळते
अन अंधारी कोठडीतून
नकार घंटा खणखणते

करू करुणा की राग कळेना
जाता जवळी हो अवहेलना
असेल काही कर्मभोग हा
गमते  दंश ते साहतांना

© डॉ..विक्रांत प्रभाकर तिकोणे
http://kavitesathikavita.blogspot.in

मंगळवार, २९ ऑक्टोबर, २०१९

दत्ताला मागणे

दत्ताला (दिवाळीचे सर्व भक्तांसाठी)मागणे
***********
समृद्धी मधले
सुख ओघळावे
तम मावळावे
भागी आले ॥
व्हाव्यात सकळ
कामना सफल
नच अमंगळ
दिसो डोळा ॥
स्वप्नांचे तोरण
सत्यास दिसावे
उन्मेष फुलावे
चहूकडे ॥
गेले ते विरावे
नवे उगवावे
अंकुर फुटावे
आकांक्षांचे ॥
विक्रांत मागतो
दत्ताला मागणे
घडो तुझे येणे
जीवनात ॥

 © डॉ.विक्रांत प्रभाकर तिकोणे
https://kavitesathikavita.blogspot.com

सोमवार, २८ ऑक्टोबर, २०१९

उगाचच झाडे तोडणाऱ्यांनो


झाडे तोडणाऱ्यांनो
**************
उगाचच
झाडे तोडणाऱ्यांनो
तुम्हाला क्षमा नाही
कदापी नाही
तुमच्या पिढीला ही
अन् तुमच्या पुढच्या पिढीलाही
तुमच्या पापाचे कर्ज
फेडावे लागेल त्यांनाही

लाज नसलेली
तुमची वक्तव्य
अवतरणे उदाहरणे
कायद्यातील पळवाटा शोधणे
राजकारणी कारणे
छी छी
किती घाणरडे !
होय
तुम्ही जिंकलात
कत्तलीची संमती घेत
चौकटीत अडकलेल्या
कायद्याकडून
अन
आंधळ्या न्यायाची
परवानगी घेवून
पण तुमच्या या पापाला
क्षमा नाही
या गुन्ह्याला माफी नाही
पडणाऱ्या प्रत्येक झाडाचे आक्रंदन
प्रत्येक फांदीचा शाप
निर्वंश करील तुमचा
उगवून विनाशाची बीज
तुमच्या छातीत
तडफड कराल तुम्ही
प्राणवायुसाठी
तेव्हा हसतील
या झाडांचे अतृप्त आत्मे
तोवर हसून घ्या
जिंकल्याबद्दल
हि लढाई
पण त्या न्यायालयात
क्षमा नसते
कुठल्याही गुन्ह्याला
एवढे मात्र ध्यानात ठेवा.
**
© डॉ.विक्रांत प्रभाकर तिकोणे

सोवळ्याचा अंत व्हावा


दत्ता तुझ्या दारातल्या 
सोवळ्याचा अंत व्हावा
उच्च नीचतेचा भाव
मनामनातील जावा ॥

तीच पूजा तिचा अर्चा
अभिषेकी तोच लोटा
भावनांना भिडणारा
पावत्यांचा गठ्ठा मोठा ॥

चालू दे रे घर त्यांचे
अन्य आहेतच वाटा
तूच तोड साऱ्यां कड्या
पार होऊ दे रे ओटा ॥

कोण शूद्र कोण श्रेष्ठ
स्पर्श कैसा अपवित्र
हिंदू हेच उपादान
राहू दे रे सार्वत्रिक

  डॉ.विक्रांत प्रभाकर तिकोणे

रविवार, २७ ऑक्टोबर, २०१९

भार्गवाच्या नाथा


भार्गवाच्या नाथा
**************
मातीचाच किल्ला 
मातीचे मावळे 
तरीही सजले 
राज्य एक ॥
मातीचाच वाघ 
मातीच्या गुहेत 
मातीच्या नाट्यात 
सहभागी ॥
मातीचा विक्रांत 
पाहतो देखावा 
म्हणतो वाहवा 
पुन्हा पुन्हा ॥
दावी ज्ञानदेव 
वैभव सत्तेचे 
सजल्या साक्षीचे 
मातीविना ॥
ठेवा दत्तात्रेया 
तत रूपी आता
भार्गवाच्या नाथा
मजलाही ॥
**
 © डॉ.विक्रांत प्रभाकर तिकोणे
https://kavitesathikavita.blogspot.com

मंगळवार, २२ ऑक्टोबर, २०१९

दत्तभक्तास

दत्तभक्तास
**********

दुःखाने भरली
सखी तुझा वस्ती
लागलीसे पथी
जीवनाच्या॥
सरेना अंधार
होईना पहाट
पाहुनिया वाट
उजेडाची ॥
परि नभी स्थिर
एक दत्त तारा
तुझिया आधारा
सदा असे ॥
नाही प्रियजन
जरी सभोवती
जिव्हाळ्याच्या गोष्टी
 सांगावया॥
तुटलेली नाती
तुझी खरी खोटी
देई दत्ता हाती
सोपवून ॥
तोच एक सखा
जन्माचा सांगाती
धृढ धरी चित्ती
सदोदित ॥
आणिक कुणास
नको घालू गळ
दुनिया ओंगळ
संधीसाधू ॥
विक्रांता कळला
हाची तो उपाय
आणि सांगू काय
तुज लागी
**
 © डॉ.विक्रांत प्रभाकर तिकोणे
https://kavitesathikavita.blogspot.com

सोमवार, २१ ऑक्टोबर, २०१९

वाट रुळलेली


सुटावा जगाचा
मायेचा आधार 
मिटावा अंधार 
अज्ञानाचा

मग मी चालावी
वाट रुळलेली 
पदी मळलेली 
भक्तांचिया

पुरे दोन घास 
वस्त्र या देहास 
उन  पावसास 
छत काही 

याहून काहीच
नाही रे मागणे
होणे दीनवाणे 
अर्थासाठी 

विक्रांत मनात 
राहावा सतत 
कृपाळुवा दत्त 
विराजित
**
 

रविवार, २० ऑक्टोबर, २०१९

दत्तपदी




तुम्ही व्हा हो धनपती 
आणि मिरवा जगती 

मज राहू द्या बसून 
दत्तपदी हरवून

मज नको घर दार
नच होणे मानकर 

छत असो चंद्रमोळी 
पडो पाण्याची रांगोळी 

दत्त पावलांचा वास 
परी घडावा तयास

मग विक्रांत सुखात 
राहो दत्त गाणं गात

शनिवार, १९ ऑक्टोबर, २०१९

कारभार



कारभार

*
दत्त सवितो
दत्त रडवितो
दत्त दाखवितो
 सुखदुःखे
.
दत्त चालवितो
दत्त थांबवितो
दत्त बळ देतो
यातायाती
.
अवघे दत्ताचे
करणे धरणे
आम्ही तो वाहणे
तया कृपे
.
मग सांगा दत्ता
काय ते मागावे  
व्यर्थ दवडावे
निर्व्याजता  
.
विक्रांत दत्ताचा
म्हणतो दत्ताला
बरा चालवला
कारभार
.
© डॉ.विक्रांत प्रभाकर तिकोणे
https://kavitesathikavita.blogspot.com
***

शुक्रवार, १८ ऑक्टोबर, २०१९

दत्ताची लेकुरे





दत्ताची लेकुरे
***************

आम्ही दत्ताची लेकुरे
आम्ही भक्तांची सोयरे

सुखे झाडू वाट त्यांची
घेवू धुळ त्या पायांची

शब्द श्रवणी झेलून
करू जीव लिंबलोणं

दत्त शब्द त्या मुखाचे
जणू मेघ अमृताचे

दत्त तया  वचनात
येई  यया हृदयात

दत्तप्रभूंचे जणू ते
घर चालते बोलते

विक्रांत शरण तया
पदी अंथरीतो काया


© डॉ.विक्रांत प्रभाकर तिकोणे
https://kavitesathikavita.blogspot.com

श्री जगन्नाथ कुंटे ऊर्फ अवधूतानंद यांना श्रद्धांजली

श्री जगन्नाथ कुंटे ऊर्फ अवधूतानंद यांना श्रद्धांजली   ******* पाहियले स्वामी अवधूतानंद शक्तिचा तरंग  उत्स्फुलित ॥१॥ पुत्र नर्मदे...