जुगार

जुगार

***

खेळतो जुगार तुझिया नावाचा 

 जन्म मी हा माझा 

लावून पणा ॥१

प्रारब्धाचा पक्ष जरी बळकट 

सारी सारा सारीपाट

त्याचा जरी ॥२

तया सारे ठाव पुढील ते डाव 

जिंकणे हवाव 

सदा तया ॥३

माझ्या पाठीराखा परी असे दत्त 

त्याचे महाद्युत 

कुणाकळे॥४

मनी असे खात्री हरेल प्रारब्ध 

जिंकेल श्रीपाद 

श्री वल्लभ ॥५

सारे लिहिलेले पुसतील लेख 

भक्तीची ती मेख 

कळू येता ॥६

भक्तीसाठी भक्ती प्रीतीसाठी प्रीती 

श्रीपादाचे प्रति 

नित्य घडो ॥७

आणिक विक्रांता काय ते जिंकणे 

श्रीपादाचा होणे 

जन्मभर ॥८

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

श्रीपादराजम शरणं प्रपदे

श्रीपादराजम्  शरणं प्रपदे

******************

श्रीपाद भक्ताचा असे पक्षकार 

करितो सांभाळ रात्रंदिन ॥

जरी येती दुःख प्रारब्धा अधीन

लावी विटाळून सारी प्रभू ॥

जगी दुष्ट शक्ती राहती लपून 

वेष पालटून येती कधी ॥

छळती गांजती भक्तां रडवती 

परीक्षाच घेती जणू काही . ॥

परि जो शरण श्रीपादा केवळ 

तयाचे सकळ इष्ट होते ॥

इह पर लोक दोन्हीही साधती 

सुख वर्षताती अप्राप्यही ॥

विक्रांत शरण श्रीपाद पदाला 

परिस लाधला पूर्व पुण्ये ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

उंबरा तळी

 उंबरतळी

*******

मनी पांघरून दत्त 

खुळे जग विसरतो

वाटा सोडून श्रेयाच्या 

तळी उंबरी बसतो ॥१

येतो शितलसा वारा 

जलकण शिंपडतो 

जणू हलकेच दत्त 

कमंडलू हिंदळतो ॥२

गंध गोडस मदीर 

आसमंतात व्यापतो 

फळ एक-एक मधु 

क्षुधा तृषा भागवतो ॥३

साऱ्या विसरती व्यथा 

अणू रेणू शांत होतो

मन उन्मन होवून

दत्त नामात रंगतो ॥४

त्याचा सोवळा सोहळा 

जरा दुरून पाहतो 

आत हसतसे दत्त 

संगे ओवळा नाचतो ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

या दत्ताने

या दत्ताने

********

या दत्ताने माझी पार वाट लावली 

पुरी वाट लावली ॥ धृ ॥

व्याधी लावली पोटी व्यथा घातली 

भयभीत करूनिया गाठ मारली ॥ या दत्ताने 

शांती लुटली माझी निद्रा चोरली 

जागताना त्याच्यासाठी ऊर्जा आटली ॥या दत्ताने 

मजा सरली माझी चैन संपली 

रंजनाची साधने ती सारी हरवली ॥ या दत्ताने 

बायको  रुसली अन् पोरे दूरावली

देवासाठी अंतरात आग लागली ॥ या दत्ताने 

दुनिया लूटली  सारी युद्धही हरली 

तहाची ती बात मागे नच उरली ॥या दत्ताने

करो हवे तो ते सारे  जीव घेवू दे रे

भाळी नावे त्याच्या मी चीरी लाविली ॥या दत्ताने

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ .

प्रतिबिंब

प्रतिबिंब

******

मुग्ध प्रतिबिंब होऊन श्रीदत्त 

आहे तरंगत 

मनात या  ॥१

परंतु जाताच  धरण्या हातात 

नाही सापडत 

काही केल्या ॥२

होतात कल्लोळ लहरींचा नाच 

प्रतिमा ती साच 

हरवते ॥३

अवघ्या जगात तसा तो माझ्यात

परी जाणीवेत 

स्पष्ट कळे ॥४

अभिन्न सतत आहे हृदयात 

मजला पाहत 

माझे डोळा ॥५

अन मी तयात माझिया वाचून 

अवघे घेऊन 

आहे नाही ॥६

शब्द हरवले पाहणे सरले 

विक्रांत नुरले 

लिहणेही ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ .

मौनावली वाट

मौनावली वाट

**********"

जरी ओलांडून आलो शिखराला 

भेटे पायरीला दत्तराज ॥१

भेटला अंतरी हृदय मंदिरी 

जाणीव कुहरी वास केला ॥२

हरवला देह मन हरवले 

दत्ताकार झाले जग सारे ॥३

पहिली पायरी अंतिम असते 

व्यर्थ हे नसते संतवाक्य ॥४

आता कधी जाणे पहाड चढणे 

घडो येणे जाणे वा न घडो ॥५

उमटला ठसा पायरीचा आत 

गिरनार वाट मौनावली ॥६

विक्रांत घेऊनी घरी ये शिखर 

उजळे अंतर काठोकाठ ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘☘

दत्ता तुझी वाट

दत्ता तुझी वाट

***********

दत्ता तुझी वाट नाही सापडत

राहतो चुकत जीव सदा ॥१

दत्ता तुझी प्रीत नाही उगवत 

राही भटकत प्राण उगा ॥२

दत्ता तुझे रूप नाही रे दिसत

कळ काळजात उठे नित्य ॥३

दत्ता तुझे शब्द कानी ना पडत 

नाही उमटत नाभीकार ॥४

धिग जीणे माझे दत्ताविन वाया 

विक्रांतही काया सुटो आता ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘☘ .

सांगावा

सांगावा

****:

धाडला सांगावा दत्तात्रय देवे 

भक्ताचिया सवे मजलागी ॥

दत्ताची कवणे ज्ञानदेव भक्ती 

येऊ देत पंक्ती सुंदरश्या ॥

माझिया सेवेचा खारीचा हा वाटा 

तुज भगवंता पोहोचला ॥

भक्तांच्या रुपी राही भगवंत 

होऊनिया मूर्त प्रेमळ ती ॥

स्वीकारी आदेश जोडोनिया कर

विक्रांत सादर सेवेलागी ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘ ४

गुह्य

गुह्य

****

दत्त काय कुणा देत असतो रे 

दत्त कुणाचे का घेत असतो रे ॥

दत्त फक्त उभा दत्त असतो रे 

सरताच मळ प्रेमे भेटतो रे ॥

फळते प्रारब्ध कर्म ही फळते 

रुजते सजते बहरून येते ॥

त्याचे देणे घेणे नसते दत्ताला 

पाप पुण्य सारा मायेचा पसारा ॥

पाप अन पुण्य बाजूला सारतो 

असून नसणे तेथे उगवतो ॥

सुखानंद कंद तयाला भेटतो 

कृपा कर गुह्य विक्रांता सांगतो ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

सांभाळले दत्ता

सांभाळले दत्ता 

*************

सांभाळले दत्ता 

जसे आजवरी 

तसेच सांभाळी 

या पुढती ॥१

फार काही तुज

मागितले नाही 

चालवले देही 

प्रारब्धात ॥२

परि संकटात 

मागे तुला हात 

तुझिया दारात 

आलो सदा ॥३

असेल दयाळा

लांच्छन भक्तीला 

वेच ही पुण्याला 

जमविल्या॥४

ठेच लागे मन 

माय आठवते 

पित्याला स्मरते 

संकटात ॥५

मात तात तूच 

माझी दयाघना 

करीशी करुणा 

सदोदित ॥६

म्हणून पायाशी 

सतत निर्धास्त 

राहूनी विक्रांत 

जगे जिणे ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com .

☘☘☘☘☘

दत्ता ओठांवरी

दत्ता ओठांवरी 

नाव तुझे येवो

जगण्याची जावो 

उठाठेव ॥

तीच आटाआटी 

भरे काठोकाठी

तया साटोवाटी 

नेऊ नको॥

इथे तिथे किती 

मोहमयी पेठा  

नेऊ नको हाटा 

दलालांचा ॥

चालव रे मला 

तुझिया मर्जीन

काट्याकुट्यातून 

हवे तर ॥

चूकू नये दिशा 

हरू नये आशा

तुझा प्रेम पिसा

दिगंबरा ॥

विक्रांत थांबला  

मोडलेल्या वाटा 

येई अवधूता

नेई बापा ॥

श्री गुरुदेव दत्त 

© डॉ.विक्रांत प्रभाकर तिकोणे
http://kavitesathikavita.blogspot.in

शब्दांनो

शब्दांनो 
******


माझ्या थकल्या शब्दांनो 
थोडे चाला रे अजूनी
काही उरल्या पायऱ्या
बाकी शिखर अजूनी

पदे रचा रे वदुनी
प्राण अर्थात ओतूनी
हेच साधन आपुले
देणे प्रभूस अर्पुनी

शब्द वाकडे तिकडे
कधी गेयता नसले
वृत्त छंदांनी सोडले
पिल्लू उनाड  सुटले

घरं ओबड धोबड
परी प्रेमाने भरले
गीत  दत्ताचे तयात
यावे वस्तीस सजले

https://kavitesathikavita.blogspot.com/

दत्त राम

दत्त राम
*****

राम माझिया  मनात 
दत्त होऊन बसला
राम वदता भजता 
दत्त स्वरूपी दिसला 

दत्त तोच रामराय
प्रभू  सर्वत्र भरला
देव विरागी तापसी
माझ्या हृदयी बसला

झोळी खडावा नि छाटी
धुनी आकाश धरती
रामा दयाघना दत्ता
याच रूपावर प्रीती

दत्त विठ्ठल सावळा
दत्त रामात ठसला
दत्त कैवारी काशीत
शिवरूपात ओतला

भेद अभेदा सहित
देई रामराया मिठी
रूप अवधूत तुझे
मज दिसू दे रे दिठी

म्हणो एकांगी विक्रांत
द्वैत खेळात पडला
दत्तचित्ताच्या स्थितित
आत्म खेळात रंगला



© डॉ..विक्रांत प्रभाकर तिकोणे
http://kavitesathikavita.blogspot.in

दिगंबरी मन

दिगंबरी मन
***********

दिगंबरी मन
ठेविले वाढून 
मी पण काढून 
बाईयांनो ॥

घडले भजन 
नाही वा कीर्तन 
दिला पेटवून 
प्राण फक्त॥

जप तप नच
घडले यजन
व्याकूळ होवून 
शब्द दिले ॥

जरी जगतोय 
संसारी वाहून 
अंतरी स्मरून 
सदा तया ॥

काळवेळ काही 
ठाव मला नाही 
येता याद देई
गळा मिठी ॥

सखा गिरणारी 
भरला अंतरी 
जगणे उधारी 
आता मला ॥

॥ गुरुदेव दत्त ॥

© डॉ..विक्रांत प्रभाकर तिकोणे
http://kavitesathikavita.blogspot.in

जोडीयला दत्तराये ||

जैसे जीवनाचे

हाती आले माप

पुण्य पाप ताप

स्वीकारले ||१

ठेविल्या बांधून

भावना कामना

निराश कामना

भगव्याची ||२

पेटवून प्राण

करी घुसळण

घडो ते घडणं

याची डोळा ||३

मनाचे अंगण

दिले मी सोडून

पाहतो बसून

येरझार ||४

विक्रांत फुटला

शतखंड झाला

पुन्हा जोडीयला

दत्तराये ||५

डॉ.विक्रांत प्रभाकर तिकोणे

http://kavitesathikavita.blogspot.in

भिऊ नको कधी

साखर फुटाने

मावा पेढा राशी

फुलांच्या ढिगात

मन माझे साक्षी

अवघा गोंधळ

धनाचा कल्लोळ

राग लोभ परी

मिटला समूळ

वदे माझे मन

हळूच आतून  

किंवा देवराय

तया संकल्पातून

जळो जन रीत

वृत्तीचा व्यापार

साठव अंतरी

चैतन्य अपार

दोनच दिसाचे

जगणे जगाचे

नाते तुझे माझे

हे जन्मो जन्मीचे

इथे मीच आहे

तिथेही असेन

भिऊ नको कधी

पाठीसी ठाकेन

 डॉ.विक्रांत प्रभाकर तिकोने

http://kavitesathikavita.blogspot.in

मायबाप दत्त भक्त

माझे मायबाप 

तुम्ही दत्त भक्त

राहती स्मरत 

दिगंबरा ||१||

तुमच्या पायीची 

लावी धूळ माथा

प्रिय दत्तनाथा 

तुम्ही सारे ||२||

तुमच्या साधने 

धीर काही येई

दत्त पथा होई 

चालणे ते ||३ ||

विक्रांता लाभावा 

अल्प आशीर्वाद

दत्ताचा प्रसाद 

तुम्हामुळे ||४ ||

डॉ.विक्रांत प्रभाकर तिकोने 

http://kavitesathikavita.blogspot.in

लिहावितो गाणी दत्त

लिहवितो गाणी

दत्त माझ्या मनी

देई शिकवणी

माझी मला ||१||

मी तो भटकळ

पतित अडाणी

करी रीझवणी

प्रभू शब्दे ||२||

नेई पुढे पुढे

कौतुक करूनी

तयाची करणी

तोच जाणे ||३||

नका करू दोस्त

माझी भलावण

असे मी खेळण

तया हाती ||४||

जाणतो अवघे

पाहून विक्रांत

दत्त भगवंत  

सर्वव्यापी ||५|| 

डॉ.विक्रांत प्रभाकर तिकोने 

http://kavitesathikavita.blogspot.in

..................................