उंबरा तळी

 उंबरतळी

*******

मनी पांघरून दत्त 

खुळे जग विसरतो

वाटा सोडून श्रेयाच्या 

तळी उंबरी बसतो ॥१

येतो शितलसा वारा 

जलकण शिंपडतो 

जणू हलकेच दत्त 

कमंडलू हिंदळतो ॥२

गंध गोडस मदीर 

आसमंतात व्यापतो 

फळ एक-एक मधु 

क्षुधा तृषा भागवतो ॥३

साऱ्या विसरती व्यथा 

अणू रेणू शांत होतो

मन उन्मन होवून

दत्त नामात रंगतो ॥४

त्याचा सोवळा सोहळा 

जरा दुरून पाहतो 

आत हसतसे दत्त 

संगे ओवळा नाचतो ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️