कवितेसाठी कविता: दत्त बडवतो

बुधवार, २४ एप्रिल, २०२४

*********

दत्त बडवतो मज बडवू दे

दत्त रडवतो मज रडवू दे

फटका बसता जागृती येता

कुठे जायचे मज कळू दे ॥१

प्रवाही वाहून फुटणे घडते

छन्नी साहून आकार उमटे

चुकता चुकता चुकले कळते

मागचे मागुते मग सरू दे ॥२

आईचे मारणे मारणे दिसते

प्रेमच त्यात ना दडले असते

जन्म जन्मीचे साठले वाढले

कृपेने त्याच्या प्रारब्ध सुटू दे ॥३

जयाच्या संकल्पे विश्र्व जन्मते

आणिक विकल्पे लयास जाते

तयाचे सुखकर आनंद गर्भ ते

दुःख इवलसे येवून भिडू दे ॥४

देह ना माझा नच हे मन ही

भोगणारा सदा पाहत राही

पाहता पाहता आकाश मधले

पाहण्याऱ्याल्या गिळून घेवू दे ॥५

🌾🌾🌾

https://kavitesathikavita.blogspot.com .

☘☘☘☘ 🕉️