कवितेसाठी कविता: सुटू द्यावे

गुरुवार, २५ एप्रिल, २०२४

*******

असते सदैव

साथ का कुणाची

सुटतात हात सुटू द्यावे ॥

खेळ जीवनाचा

पहायचा किती

मिटतात डोळे मिटू द्यावे ॥

हातात नभाच्या

असतेच काय

फुटतात मेघ फुटू द्यावे ॥

येता ऋतूराज

फुलतात वृक्ष

जगतास गंध लुटू द्यावे ॥

सरताच ऋतू

गळतो बहर

विटतात रंग विटू द्यावे ॥

येताच भरून

सुचतेच गाणे

हृदयात दुःख उमटू द्यावे ॥

सुखाचे दुःखाचे

चीर जीवनाचे

मनाला तयात लपेटू द्यावे ॥

🌾🌾🌾

https://kavitesathikavita.blogspot.com .

☘☘☘☘ 🕉️