शहर

शहर

*****

तेच चार स्वीकार तेच चार नकार 

जीवनाचा आकार  लोळागोळा ॥

त्याच चार वाटा त्याच चार खाटा 

देहाचा भोगवटा ठरलेला ॥

तीच सकाळ देही तीच संध्याकाळीही 

जीवनाची वही कोरी कोरी ॥

तीच काळी नजर तेच जुने जहर 

तेच धूर्त शहर विखारी रे ॥

अंता वाचून अंत तरी काळ अनंत

ठेचलेली खंत पार पूर्वीच ॥

साचले शब्द सारे विझले शब्द सारे 

आकाशीचे तारे अशनी झाले ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘ ..

पेलवेना

पेलवेना

******

तुटलेल्या वाटे चालणे ते कुडे

परी तेही घडे 

कुठल्या प्रारब्धे

तिथे दूरवर चांदणे सुंदर 

परी पंखावर 

ओझे हे मणाचे 

सावळे सुंदर स्वप्न डोळ्यावर 

परी ओठावर

उतरेना शब्द  

दत्त चालवतो म्हणून चालतो

अन्यथा घडतो 

एक कडेलोट

विक्रांता भक्तीची कृपाच देवाची

आजची उद्याची

सरू गेली चिंता

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

कृष्ण स्मरण

कृष्ण स्मरण

***********

कृष्ण भक्तीचे अंगण

कृष्ण कृपेचे कारण 

कृष्ण ज्ञानाचे सिंचन 

भगवत गीती ॥

कृष्ण कर्माची जाणीव 

कृष्ण योगाची राणीव 

कृष्ण प्रेमाची सोलीव 

मूर्त साकार ॥

कृष्ण मैत्रीचा आधार 

कृष्ण प्रीतीचा आकार 

कृष्ण कैवल्य साचार 

डोळ्यापुढती ॥

कृष्ण दुष्टांस वधिता 

कृष्ण भक्तांस रक्षिता 

कृष्ण धर्म संस्थापिता 

पुरुषोत्तम ॥

कृष्ण कुटील निर्मळ

कृष्ण जटिल मोकळ 

कृष्ण सलील आभाळ 

अपरंपार ॥

कृष्ण आकलना पार 

कृष्ण अध्यात्माचे सार 

कृष्ण काळजाची तार

भक्ताचिया ॥

कृष्णा सदैव भजावे 

कृष्णा हृदयी धरावे 

कृष्णा विना न राहावे 

क्षणभरही ॥

कृष्ण चरित्र सुगंध 

कृष्ण भक्तीचे अभंग 

कृष्ण जीवनाचा रंग 

अवघा व्हावा ॥

कृष्ण ठेवुनिया चित्ती 

मागे भक्तीसाठी भक्ती

अन्य नको या विक्रांती

काही देऊस॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

दत्त सर्वव्यापी

दत्त पाहिला 

*********

दत्त पाहिला जनात 

दत्त पाहिला मनात 

दत्त पाहिला वनात 

दत्त ठाई ठाई ॥१

दत्त पाहिला प्राण्यात

दत्त पाहिला पक्षात

दत्त पाहिला वृक्षात 

दत्त कणोकणी ॥२

दत्त पाहिला पाण्यात 

दत्त पहिला धान्यात 

दत्त पाहिला अन्नात 

दत्त प्रसादात ॥३

दत्त पाहिला डोळ्यात

दत्त पाहिला मनात 

दत्त पाहिला हृदयात 

दत्त अंतर्बाह्य ॥४

दत्त  पाहिला स्थुळात 

दत्त पाहिला सूक्ष्मात 

 दत्त पाहिला सर्वांतरात

 दत्त महाशून्यात ॥५

दत्त उणे या जगात 

काही दिसेना विक्रात 

दत्त गाण हे दत्तात 

उमटे कौतुकात ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘

दत्ता माझ्या भाळावर

दत्ता माझ्या भाळावर 
कृपेची अक्षर 
रेखाटली अपार 
दया तुझी ॥

दत्ता माझ्या जगण्यात 
दाटलेल्या काळोखात 
पेटवली फुलवात 
प्रेमे तूची ॥

अगदीच हट्ट नव्हता 
परी तूच हवा होता 
हळूवार या चित्ता 
आलास तू ॥

सदा पायी असू दे रे 
तुझ्यासाठी जगू दे रे 
गांजल्यांना दाऊ दे रे 
तव पायवाट ॥

सुखावला विक्रांत 
दत्त आला जगण्यात 
राहे आता गाणे गात
तयाचिच मी॥

  © डॉ.विक्रांत प्रभाकर तिकोणे
https://kavitesathikavita.blogspot.com

म्हातारा

म्हातारा
******

भयान राती
उजाड पथी
टाळून वस्ती
जाई म्हातारा

कंदील हाती
लाकूड काठी
देहावर ती
घट्ट कांबळी

खोल डोळे
गुहे मधले
ओठावरले
जंगल मोठे

कुठे चालला
या वेळेला
भय सांडला
नच कळे

झपझप झाले
कंदील हले
खडखड बोले
पायी वाहाण

वाट तयाची
जणू रोजची
युगायुगांची
असावी ती

डोळे चिमुकले
खिडकी मधले
होते जुळले
त्यास कधी

गूढ आकृती
कंदील स्मृती
अजून मना ती
रुंजी घाले

© डॉ..विक्रांत प्रभाकर तिकोणे

http://kavitesathikavita.blogspot.

रोकडी भक्ती

रोकडी भक्ती
***********

एक रोकडी भक्ती
देई दत्ता मजप्रती
सरू दे रे आसक्ती
संसाराची या ॥
मातीच्या या देहाची
उद्या माती व्हायची
काय माझ्या कामाची
तुझ्याविना रे ॥
पुरे हे वरवरचे
नाते बंध फुकाचे
कुठवर सांभाळायचे
दामाकामातले ॥
चार टके कुणी जोडले
त्यांचे डोके फिरले
नकोच वेड असले
लावू मजला ॥
सुटू दे रे पसारा
अर्थहीन खेळ सारा
जन्मो जन्मी चालला
चाळा असला ॥
मजवरती दत्ता
असो तुझी सत्ता
सांभाळ विक्रांता
दीनासी या ॥
**
(c) डॉ.विक्रांत प्रभाकर तिकोणे
https://kavitesathikavita.blogspot.com

अभिनंदन रे

अभिनंदन रे 

*************

करी नंदन रे 

अभिनंदन रे 

तुझा वंदन रे 

शुरवरा ॥

केले खंडन रे 

रिपू मर्दन रे 

रण जिंकून रे

रणवीरा ॥

होय जय जय रे 

सरे रिपू भय रे

मिळे अभय ये

मायदेशा॥

आला जिंकून रे

यश घेऊ न रे 

उभा राहून रे 

ताठ तेथे ॥

ऋणी भुमी रे 

दे सलामी रे 

गातो आम्ही रे 

गुणगान ॥

लाखो विक्रांत रे 

ठेवती ह्रदयात रे 

पाही प्रतिकात रे

तुज सदा 

© डॉ..विक्रांत प्रभाकर तिकोणे

http://kavitesathikavita.blogspot.in

आम्ही दत्ताचे चाकर

आम्ही दत्ताचे चाकर

आम्हा दत्ताची भाकर

पोट चाले दत्तावर

सदोदित

दत्त म्हणता म्हणता

काम चालू राहे सदा

दत्त जगण्याच्या वाटा

चालविता

दत्त निजेला गोधडी

दत्त तहान या ओठी

जन्म चाले दत्तासाठी

अहोरात्र

दत्त विक्रांत मालक

जन्म मरण चालक

युगा युगांचा पालक

भाग्यवशे

काय सांगू त्याची मात

किती ठेवितो सौख्यात

धनी करितो क्षणात

नोकराला

©डॉ.विक्रांत प्रभाकर तिकोणे

http://kavitesathikavita.blogspot.in

रीत मनावर

रीत मनावर 


तू शब्द आठवत 
नजर झुकवत 
डोळे मिटत 
बोलतेस 

तव बोल लाघट 
स्वर अनवट 
मन होत गंधीत
दरवळते

मी जीर्ण पिंपळ 
करतो सळसळ 
झेलत वादळ 
एक नवे 

मी पुन्हा बहरतो 
आकाश भरतो 
तुजला पाहतो 
पानोपानी 

तू येत येत 
पण जाते हरवत 
मी वाट पाहात 
ग्रीष्म होतो

तू किती दूरवर 
जन्मांचे अंतर 
मी रीत मनावर 
पांघरतो 


डॉ .विक्रांत प्रभाकर तिकोणे 
http://kavitesathikavita.blogspot.in

तीच वाट

तीच वाट
******

तीच वाट 
तीच पहाट 
तीच आहट 
गोठलेली 

मी माझ्यात 
मी जगण्यात 
मी असण्यात 
मांडलेली

माझे असणे 
माझे नसणे 
माझे कळणे 
तुझ्यामुळे 

थोडा ताप 
थोडा शाप 
थोडा उ:शाप
काही इथे 

तोच गोंधळ 
तीच खळबळ 
तेच पोकळ 
शून्य भरे 

कळल्या विन मी
वळल्या विन मी 
जळल्या विन मी 
चितेवरीं


डॉ.विक्रांत प्रभाकर तिकोणे 
http://kavitesathikavita.blogspot.in

॥ श्री ज्ञानेश्वर माऊली ॥

‍ॐ नमो ज्ञानेश्वराय ।

दिव्य स्वयंप्रकाशाय।

महानंदस्वरुपाय।

चिद्घनमुर्ते॥

मी बालक तुझा नेणता ।

ना कळे मार्ग चालता।

धरुनिया तू हाता ।

ने ई गे माय॥

घोर या संसार वनी ।

पडलो मी येऊनी ।

कडेवर घेऊनी ।

नेई गे माये ॥

कर्म काही कळेना ।

स्वधर्म हाती येईना ।

अंधकार मिटेना ।

सांभाळ गे माय ॥

भक्तीची वाटा।

नेई मज आता ।

पांगुळ मी पडता ।

चालवी गे माये ॥

विक्रांत हा भ्रमाला।

मायेत या अडकला ।

तव प्रेमा आसावला।

धाव गे माये ॥

डॉ.विक्रांत प्रभाकर तिकोणे

http://kavitesathikavita.blogspot.in

ग्रंथ ज्ञान

पाहिले अपार 

ग्रंथांचे प्रकार 

ज्ञानाचा विस्तार 

अवाढव्य ॥

पाहू जाता मीती

कळेना ती किती 

बुद्धीचिया माथी

भार फक्त ॥

शब्दांचा पसारा

मनात मावेना 

विक्रांत दिसेना

अनुभव ॥

कुठून ते आले 

अन् कुठे गेले 

बरडी वाहिले 

जैसे जळ ॥

दत्त ज्ञानदेवा

करा हो उपाय

भरा हे ह्रदय

आत्मज्ञानी  ॥

डॉ.विक्रांत प्रभाकर तिकोणे

http://kavitesathikavita.blogspot.in

कृपा

 कृपा

वळवाच्या पावसागत ते तिचे येणे  

अपेक्षा नसतांना धो धो बरसणे

आणि मज देवून जाणे ||

शीतलता ||

हे उपकार म्हणावे जीवनाचे

की वरदान कुठल्या तपाचे

सुकलेल्या तरूवराचे ||

जीवन ती ||

ती एकांतात फुललेले गाणे

ती निरवतेत उमटले तराणे

माझे मलाच कळणे ||

आत्मरूप ||

आलीस पण सांग का थांबशील 

वा झुळूक होवून निघून जाशील    

सांग चांदणे नभातील ||

किती काळ ||

हे सुख ओघळले न मागता

हे फुल उमललेले न सांगता

हे गीत उमटले गाता गाता ||

अवचित ||

मी जाहलो आभाळ आता

मी वारा मुक्त चिंब सरिता   

जीवन कृपा ओघळता ||

मजवरी ||

डॉ.विक्रांत प्रभाकर तिकोणे 

http://kavitesathikavita.blogspot.in