पुन्हा एकदा

पुन्हा एकदा

*********

पुन्हा एकदा आकाश

चांदण्यांनी भरून गेले 

पुन्हा अनाम सुखाने

मन बहरून गेले ॥

तेच स्थळ तीच भेट

देहातील आवेग थेट

पुन्हा एकदा उधाण 

जीवास उधळून गेले ॥

 हिंडलो मी रानमाळी 

गिरीशिखर धुंडाळले 

सौख्य त्या क्षणाचे मज 

आज इथे मिळून गेले ॥

नव्हतोच तेव्हा मी 

नव्हतेच जग राहिले 

अस्तित्व हे आणलेले

तुझ्यात हरवून गेले ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ .

नको मोक्ष

पाणी ओंजळीत

************

नको मज मोक्ष नसे स्वर्गी काज 

भक्तीचे ते व्याज सरू नये ॥१

सगुणी अखंड राहावा डुंबत 

दत्ताच्या रंगात रात्रंदिन ॥२

नको पैलतीर त्रासणे संसारी

सुखे ऐलतीरी जन्मा यावे ॥३

मागतो विक्रांत भाव सदोदित

पाणी ओंजळीत सागराचे ॥४

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ .

लाचावली जिव्हा

लाचावली जिव्हा

************

अन्ना लाचावली जिव्हा 

गेली चवीच्या गावाला 

ताट मांडूनिया तेच 

भूक लागे नाचायला ॥१

मृत संस्कार जुनाट 

आले देहात जन्माला 

षडरसी त्या रंगला 

प्राण तृषार्थ जाहला ॥२

मन ओढतसे मागे 

जिभ परी पटाईत

व्रत मोडूनिया म्हणे 

हीच जगण्याची रीत ॥३

कशी दत्ताची परीक्षा 

प्रश्न कठीण मठ्ठाला 

गुरु दिधल्या वाचून 

बळे लावी अभ्यासाला ॥ ४

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ .

दास

दास

****

हीन दीन दत्ता तुझा मी रे दास 

घेई हृदयास मजलागी ॥

नाही पुण्य गाठी नाही सेवा काही 

तूच तुझा देई बोध मज ॥

 जाणतो अजून बहु चालायचे 

तुज भेटायचे तप थोर ॥

चालतो पांगळा पाहतो आंधळा 

येता तुझ्या दारा दया घना ॥

म्हणुनिया माझ्या मनी काही धीर 

होऊ दे उशीर मर्जी तुझी ॥

तुझ्या पालखीचा असे मी रे भोई 

करूनिया घेई सेवा रुजू ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ .

दत्ता राही

दत्ता राही

+*+*+

दत्ता राहि रे माझिया मनात 

कृपा बरसत रात्रंदिन ॥

दत्ता वस रे तू माझीया ओठात 

असता वाहत देहराशी ॥

दत्ता ठस रे माझिया चित्तात 

जागृत स्वप्नात सुषूप्तीत ॥

दत्ता देई रे तू हातात हात 

सर्व संकटात अहर्निशी ॥

 दत्ता राही रे तू सदा जीवनात 

सुखात  दुःखात क्षणोक्षणी ॥

दत्ता होई रे तू सर्वस्वच माझे

काज जगण्याचे जगतात ॥

दत्ता मागू काय तुजलागी आता

देई रे विक्रांता नाव तुझे ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘

सुमन

सुमन 

****

जीवन सुमन दत्ताला वाहिले 

काही न उरले माझे आता ॥

सुमन कुठल्या असो रानातले 

केवळ फुलले तयासाठी ॥

स्वीकारा दयाळा जरी कोमेजले. 

कृमीं टोकरले असो तया ॥

उन वारीयास साहत राहिले

डोळे लागलेले तया वाटे॥

आता ओघळेल तरुच्या तळाला 

नेई रे कृपाळा तेव्हा तरी ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘

बाहुला

बाहुला

*****

पायरी पातलो दत्ता तुझी आता 

नाही भय चिंता 

जगताची ॥

बाप कनवाळू झाला अनिवार 

नेले मनापार 

धरूनिया ॥

ठेविले मज देह मनातील 

वस्त्र दाखवीत 

जणू काही ॥

पांघरतो मन देही कधी जरी 

गाठी झाल्या दुरी 

बांधलेल्या ॥

परी वठवतो भूमिका ती छान

दत्त प्रयोजन 

समजून ॥

अंतरी बाहेरी करी तो ची लीला 

अरे मी बाहुला 

तयाधीन ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘

स्वामी माय

स्वामी माय

*******

तुझ्या करूणेने चिंब मी भिजलो  

स्वामी सुखावलो 

अंतर्यामी ॥१

तुझिया दर्शने जाय क्षीण सारा

चैतन्याचा झरा

वाहे देही ॥२

जीवन खेळात पडतो रडतो 

बाप सांभाळतो 

जाणे परी॥३

किती कष्टतोस देवा माझ्यासाठी 

येसी घडोघडी 

सांभाळाया i४

विक्रांत निश्चिंत असे सर्वकाळ 

पाठी स्वामी माय 

म्हणुनिया ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘

दता भेटायाला

दता भेटायाला

***********

पुन्हा भेटायला निघालो दत्ताला 

जीवीच्या जीवाला आपुलिया ॥१

तयाविना रिते काय आहे इथे 

महात्म्य परी ते स्थानाचे त्या ॥२

जिथे गेले संत महान ते भक्त 

श्रेष्ठ नवनाथ पुन्हा पुन्हा ॥३

तयाची ती शक्ती आहे तिथे किती 

कळत्या कळती विलक्षण ॥४

मळलेले मन तिथे हो पावन 

श्रध्देची वाढून येते वेल ॥५

गिरनारी नाथा करी कृपा आता 

परत मागुता धाडू नको ॥६

घेई सामावून माझे मन प्राण

नुरावा रे कण विक्रांत हा ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘☘ .

ज्ञानदेव -कृपेचे लाघव

ज्ञानदेव -कृपेचे लाघव

****************

भाग्याचा म्हणून रानी भटकता 

भेटे अवचिता चिंतामणी ॥१

तृष्णे लागी होतो बरडी धावत 

पातलो अमृत जल तिथे ॥२

फळले सुकृत भेटले दैवत 

हव्यासा सकट दैन्य गेले ॥३

आता मी चोखट  मिरवतो दाट 

प्रेम वहिवाट आळंदीची ॥४

मायबाप सखा माझा ज्ञानदेव 

कृपेचे लाघव ओघळले ॥५

जीवनाची माझ्या सारी फुले झाली 

पडून राहिली पायी तया ॥६

आता हा विक्रांत सुखे घनदाट 

तयाचा शब्दात नांदतो गा ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘☘ .

हौस

  

हौस

******

कामनेचा खेळ 

पुरे हा दयाळा 

घेई रे पदाला 

तुझ्या आता ॥१

फाटलेले वस्त्र 

जरी भरजरी 

पुसण्यास परी 

राहू दे रे ॥२

नको पांघरूस 

नको मिरवूस 

पुरव  रे हौस 

भक्तीची ही ॥३

राहू दे होवून 

तुझा दास आता 

आणिक विक्रांता 

नको काही॥४

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘ 

तो मी !

तो मी !!

********

करताच तू 

बंद द्वार 

रिता रस्ता 

होता समोर

आता पुन्हा 

चालायचे 

कुठे असे 

अन जायचे

जगायचे 

कशासाठी 

उरायचे 

कुणासाठी

अशा प्रश्नास 

नव्हते उत्तर 

नकोच होते 

आणि उत्तर 

तुझे स्वप्न

तुझा भास

मनी होता

तुझा ध्यास

जरी सोडवत 

नव्हते मना

पण थांबणे

होते पुन्हा

अन थांबलो 

तिथेच बसलो 

नंतर नाहीच 

तो मी उरलो 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘

स्वामीमाय

स्वामीमाय

*******

कैसे स्वामीमाय तुम्हा म्या वर्णावे

आकाश मोजावे कैसे हाती ॥१

माझिया शब्दांचे इवले भांडार 

तुम्हा पायावर वाहियले ॥२

काय त्याचे मोल जरी ना जाणतो 

परी उधळतो वारंवार ॥३

मातीच्या भांड्यात मातीची व्यंजने

घेई कौतुकाने माय हाती ॥४

तैसी माझी बोल करावे स्वीकार 

तुम्ही कृपाकर मायबाप ॥५

विक्रांत वर्णाया जरी उताविळ 

स्वामीच केवळ वदवते॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘..

कृष्ण स्मरण

कृष्ण स्मरण

***********

कृष्ण भक्तीचे अंगण

कृष्ण कृपेचे कारण 

कृष्ण ज्ञानाचे सिंचन 

भगवत गीती ॥

कृष्ण कर्माची जाणीव 

कृष्ण योगाची राणीव 

कृष्ण प्रेमाची सोलीव 

मूर्त साकार ॥

कृष्ण मैत्रीचा आधार 

कृष्ण प्रीतीचा आकार 

कृष्ण कैवल्य साचार 

डोळ्यापुढती ॥

कृष्ण दुष्टांस वधिता 

कृष्ण भक्तांस रक्षिता 

कृष्ण धर्म संस्थापिता 

पुरुषोत्तम ॥

कृष्ण कुटील निर्मळ

कृष्ण जटिल मोकळ 

कृष्ण सलील आभाळ 

अपरंपार ॥

कृष्ण आकलना पार 

कृष्ण अध्यात्माचे सार 

कृष्ण काळजाची तार

भक्ताचिया ॥

कृष्णा सदैव भजावे 

कृष्णा हृदयी धरावे 

कृष्णा विना न राहावे 

क्षणभरही ॥

कृष्ण चरित्र सुगंध 

कृष्ण भक्तीचे अभंग 

कृष्ण जीवनाचा रंग 

अवघा व्हावा ॥

कृष्ण ठेवुनिया चित्ती 

मागे भक्तीसाठी भक्ती

अन्य नको या विक्रांती

काही देऊस॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

कृष्णस्पंद

कृष्णस्पंद

******::

राधेच्या मनी 

नित कृष्णगाणी 

रिमझिमती नव-

श्रावण होवूनी

कृष्णा आधीही

कृष्ण होता

कृष्ण राहीला

कृष्ण जाता 

त्या कृष्णाच्या 

रूपावरती 

विश्व  उमलती 

आणिक जाती 

राधेविन का 

कृष्ण असतो  

कृष्णाविन न

राधे अर्थ तो  

अनंत कृष्ण 

अनंत राधा 

अनंत गाणी 

अनंत जगता 

कृष्ण स्पंद 

ज्याला कळतो 

तो राधाच

होवून जातो 

 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

दत्त निवारी

दत्त निवारी

********

दुःखास निवारी देैन्यास विदारी

दारिद्रता सारी दत्त दूर करी ॥१

तयाला शरण जाता भक्तजन 

अकाली मरण येणार कुठून॥२

लोभाचे हनन क्रोधाचे ज्वलन 

काम उच्चाटन करी दयाघन ॥३

जरी तू पतित लोभाच्या मातीत 

जाशी हरवित साधना फलित ॥४

तरी तो निवारी सांभाळी सावरी 

प्रभू सर्व काळी धरूनिया करी ॥५

विक्रांत तयाच्या ऐकून किर्तीला

शरण रिघाला जीव आसावला ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

पाचवा पुरुषार्थ

पाचवा पुरुषार्थ

****::::******

मिळे ते स्वीकार

केले समाधाने

जगलो सुखाने

 प्राप्त  जे ते ॥

दु:खाला नकार 

कधी ना दिधला

रोष न धरला 

अभावाचा ॥

इंद्रिया आधीन

झालिया वाचून 

इंद्रिया तोषून

शांत झालो ॥

अहो ते जगणे 

देवाजीचे देणे 

तयात वाहने 

त्याची मर्जी ॥

चारी पुरुषार्थ 

धर्मे निरोपिले 

जगता ते आले 

हे हि कृपा ॥

विक्रांता स्वीकार 

चारीही घडला

भक्तीचा उरला

पाचवा तो ॥

देई दत्तात्रेया 

उरले ते दान 

उभा मी घेवून

झोळी उभा ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

सत्ता

सत्ता

*****:

जरी पदोपदी असे तुझी सत्ता 

लागतो न पत्ता कधी तुझा ॥१

तुझ्या माझ्यामध्ये मायेचा पडदा 

का रे हा सर्वदा टांगलेला ॥२

बहु लांब रुंद बदले क्षणात 

पाडी संभ्रमात मजलागी ॥३

जीवलग नाती प्रीतीच्या त्या गोष्टी 

संसार आसक्ती सुटेनाचि ॥४

हुशारीच्या बाता ज्ञानाचे दर्शन 

येतसे घडून वारंवार ॥५

देहाच्या संगती गुणाचे वर्तन 

चाले रात्रंदिन जीवनात ॥६

थकलो कृपाळा साऱ्या पसार्‍यास 

प्रभू तुझा दास शक्तीहीन ॥७

कृपाची केवळ अन्य न साधन 

त्राही भगवन तूच मज ॥८

विक्रांत पतीत संसार पंकात 

धरून मनात आशा तुझी ॥९

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.

भगवती

भगवती

******

श्यामला कोमला रुद्रायै कमला 

चिन्मयी मृण्मयी आराध्ये सकला 

उदारे विशुद्धे सदोदित सिद्धे 

रक्षसी आपदे सदैव भक्ती दे

कल्याणी श्रीमणी विश्वाची जननी 

निजभक्त दासा सौख्याची कहाणी

माता भगवती वस मम चित्ती 

तुजविण मज नच अन्य गती 

शुभांगी दिव्यांगी शिवांगी अर्धांगी 

विश्व नाट्य लीला करशी निजांगी

हर्षित अर्पित तव पदावरी

विक्रांत सुमन जीवन स्वीकारी

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘.५२२

सांभाळले दत्ता

सांभाळले दत्ता 

*************

सांभाळले दत्ता 

जसे आजवरी 

तसेच सांभाळी 

या पुढती ॥१

फार काही तुज

मागितले नाही 

चालवले देही 

प्रारब्धात ॥२

परि संकटात 

मागे तुला हात 

तुझिया दारात 

आलो सदा ॥३

असेल दयाळा

लांच्छन भक्तीला 

वेच ही पुण्याला 

जमविल्या॥४

ठेच लागे मन 

माय आठवते 

पित्याला स्मरते 

संकटात ॥५

मात तात तूच 

माझी दयाघना 

करीशी करुणा 

सदोदित ॥६

म्हणून पायाशी 

सतत निर्धास्त 

राहूनी विक्रांत 

जगे जिणे ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com .

☘☘☘☘☘