सोमवार, २९ फेब्रुवारी, २०१६

तया गाणगापुरी





कुणीतरी न्या हो मज तया गाणगापुरी
मूर्ती अदृष्य परी पद दाखवा ती गोजीरी ||
सुस्नास करुनी मी भीमा अमरजा तीरी
धन्य होईन प्रदक्षिणे तया पिंपळ उंबरी ||
चार घटिका कुंडाशी त्या पाराशी थांबुन
लीला चरित्र ते छान गुरु कौतुक आठवीन ||
भक्त सोयरे देखीन तया डोळ्यात साठवीन
भूमी पावित्र चुंबुन तेथ नतमस्तक होईन ||
तया पादुका वरी माझा जीव ओवाळीन
तया पालखीच्या भोई मी चरणी लोळीन ||
तया चैतन्य प्रवाही ऋणी याचक होईन
कण विभुती होत अवघा जन्म हा देईन ||
कली असुनी जन्म ब्रह्मपदासी मिरवीन
अर्थ ऐसा मी माझ्या भक्तीने बदलीन ||
विक्रांत प्रभाकर तिकोणे
http://kavitesathikavita.blogspot.in

रविवार, २८ फेब्रुवारी, २०१६

श्वासांचे वादळ



आला श्वास रिंगण घाले
गेला श्वास विंझन वारे
हळवा स्पर्श उष्ण हलका
कळतो तरीही अलिप्त परका
थांबे क्षणभर दाटते वादळ
क्षणही उरतो नावाला केवळ
हुळहुळणारा त्रिवेणी संगम
मधुर गहिरे गूढसे स्पंदन
मोर पिसारा फकिरी हलका
स्पर्शे मस्तकी देवूनी झटका
घडते काही घडल्यावाचुनी
विक्रांत आकार पडल्यावाचुनी

विक्रांत प्रभाकर तिकोणे


शनिवार, २७ फेब्रुवारी, २०१६

भक्तीचे मोजमाप







माझिया भक्तीचे
काय मोजमाप
लाजे आपोआप
मन माझे ||
म्हणावी साधना
तरी हसू येते
म्हणे डबक्याते
महासागर ||
बहु पातकांची
असावी गाठोडी
म्हणोनिया थडी
अडकलो ||
संतांचे आशिष
मागे असतात
परी चुकतात
मार्ग सारे  ||
गांडूळाना माती
जगण्याची प्रीती
तैश्या काही रिती
दिन जाये ||
विक्रांता सनाथ
करी दयाघन
दावुनी चरण
सुकुमार ||
भेटी आळवितो      
करीतो  प्रलाप
दत्त मायबाप
धाव माझे ||

विक्रांत प्रभाकर तिकोणे

श्री जगन्नाथ कुंटे ऊर्फ अवधूतानंद यांना श्रद्धांजली

श्री जगन्नाथ कुंटे ऊर्फ अवधूतानंद यांना श्रद्धांजली   ******* पाहियले स्वामी अवधूतानंद शक्तिचा तरंग  उत्स्फुलित ॥१॥ पुत्र नर्मदे...