कवितेसाठी कविता: भक्तांची वचने

गुरुवार, १८ फेब्रुवारी, २०१६

तुझिया प्रीतीची ऐकुनी कवणे

भक्तांची वचने प्रियकर ||१

प्रेमाने डोळ्यात आसवे भरती

उरी उमटती प्रेम उर्मी ||२

अंतरी दाटते भावना वादळ

अंगी वज्रबळ संचारते ||३

जीवास आधार श्रद्धेस जोजार

प्रेमास अपार पूर येतो ||४

तुझेच ते दूत हक्काचे हकारी

असे माझ्यावरी ऋण त्यांचे ||५

तयांच्या कथेचे करिता श्रवण

ओथांबले मन वांच्छा करी ||६

विक्रांत प्रेमाची गोष्ट एक होवो

दत्तराय देवो आलिंगन ||७

विक्रांत प्रभाकर तिकोणे

कवितेसाठी कविता