शुक्रवार, ३१ मे, २०१३

गोरी बायको कश्यासाठी ?




http://2.bp.blogspot.com/-DH7gLG7vnFo/TpiD_Y8cJqI/AAAAAAAAAH8/2B0FoY58DnI/s320/Girl.bmp




गोरी बायको कश्यासाठी ?

लोकांनी पाह्ण्यासाठी

आपल्यावर जळण्यासाठी

त्यांना जळतांना  पाहून

आपण खुश होण्यासाठी .

गोरी बायको कश्यासाठी ?

समारंभी मिरवण्यासाठी

गर्दीत सांभाळण्यासाठी

सांभाळतांना तिला तसे

गर्दीत हिरो ठरण्यासाठी

गोरी बायको कश्यासाठी ?

गोरी पोर होण्यासाठी

कष्ट त्यांच्या लग्नाचे

आपोआप टाळण्यासाठी

गोरी बायको कश्यासाठी ?

कुणा विसरून जाण्यासाठी

तुझ्याहून सुंदर गोरी ...

असे काही जिरवण्यासाठी



विक्रांत प्रभाकर

 

त्याने होय म्हणताच




त्याने होय म्हणताच 
सर्वांगी हर्ष दाटला
थांब क्षणभर मना
जरा सावरू दे मला

स्वप्नातील स्वप्न असे
दिसे आज जागृतीला
जणू एक मोरपीस
स्पर्शले रे  हृदयाला 

आज साऱ्या तपस्येचे
पुण्य आले रे फळाला
याहून अधिक काही..
नाही नि नकोच मला 

त्याचा हरेक शब्द मी
हृदयामध्ये झेलला
देहातील कण कण
आज वादळ जाहला

हे खगांनो हे फुलांनो
सांगा हे साऱ्या जगाला
प्रकाश अन वाऱ्यानो
पसरा दाही दिशाला

विश्व पुरेना आनंदा
काय करु हृदयाला 
त्याने स्वीकारले मला
अर्थ जीवनाला आला

विक्रांत प्रभाकर
http://kavitesathikavita.blogspot.in/




गुरुवार, ३० मे, २०१३

कवीराजा (नवरंग १९५८ -भरत व्यास स्वैर अनुवाद)

    
  
कवीराजा
करू नकोस उगाच शब्द तोडमोड
काही धंदा कर थोडे पैसे जोड
शेर शायरी तुझी नच कामी येणार
कवितेची वही अन वाळवी खाणार
भाव वाढतो वेगान धान्य महागते भराभर
मरशील उपासाने भुके जागशील रात्रभर
म्हणून सांगतो तुज मित्रा हे सारे सोड 
काही धंदा कर थोडे पैसे जोड
चल फेक पेन ते कर बंद काव्यमशीन
बघ रोकड किती घरी नि शिल्लक अजून
घरात उरले किती तूप नि गरम मसाला
किती पापड लोणच अन तिखट मसाला
किती तेल मिरची हळदी नि धने जिरे
कविराजा अन हळूच तू वाणी बन रे
अरे पैशावर लिही काव्य अन गीत भूकेवर
गव्हा वरती गझल होऊ दे शेर धान्यावर
लवंग मिर्ची वर चौपाई तांदुळावर दोहे
कोळश्यावर लिहशील तर वाह क्या बात है
कमी भाड्याच्या खोलीवर लिही कव्वाली
छन छन करती रुबाइ ती पैसेवाली
शब्दांच्या जंगलात खूपच गोंधळ असतो
कवी संमेलन मित्रा भांडण तंटा असतो
मुशायरयाचे शेर सारेच रगडा असतो
पैसेवाला शेर फक्त वाहवा मिळवतो
म्हणून सांगे मित्रा करू नको डोकेफोड
काही धंदा कर थोडे पैसे जोड

विक्रांत प्रभाकर
http://kavitesathikavita.blogspot.in/

बुधवार, २९ मे, २०१३

करतात घाण



करतात घाण रस्त्यात लोक
थुंकतात घाण जिन्यात लोक
लावूनिया पाट्या जागोजागी
पाटीवरी त्या थुंकतात लोक
कधी गांधीगिरी ती करू जाता
फेकूनि घाण बोलावतात लोक
कुणाची घाण काढू किती मी
मलाच घाण म्हणतात लोक
प्रश्न कळकळीने जरी मांडला
टाळूनि मज हसतात लोक
येता कधी मग शब्दात घाण
पाहुनी ती का चिडतात लोक ?
अशी घाण टाकुनी जागोजागी
मनी घाण का लपवतात लोक ?

विक्रांत प्रभाकर
http://kavitesathikavita.blogspot.in/


नक्षलवादी..




आमचीच मारतात
का आम्हास हि माणसे
आपलेच रक्त कशी
सांडतात हि माणसे .
जळूनिया कूस आई
हंबरडा फोडते  रे
आज त्याची उद्या तुझी
घर हेच जळते रे  .

विक्रांत प्रभाकर

http://kavitesathikavita.blogspot.in/

भय दाटलेले


भय दाटलेले l आहे जगण्याचे l
कुठल्या व्यथेचे l ओझे हे ll ll
मीच सोडविता l मज म्हणविता l
हसता हसता l पुरे वाट llll
कुणाला बोलू l आणि समजावू l
अवघे टाकावू l असे बोल llll
फुटक्या शब्दांचे l जुनेच हे गाणे l
लिहितो नव्याने l शहाणा मी ll ll
विक्रांत प्रभाकर

http://kavitesathikavita.blogspot.in/

रविवार, १९ मे, २०१३

नर्मदा मैयास मागणे






एकच ती वाट मज
चालायची आहे आता
एकाच त्या काठावर
जगायचे आहे आता


जमविले सारे सारे
सांडायचे आहे आता
माई तुझ्या प्रेमी पुन्हा
भिजायचे आहे आता
 
येणे जाणे सारे सारे
तुझ्या कृपाबळावर
म्हणूनिया विनवितो
बोलाव ग लवकर  



विक्रांत प्रभाकर

http://kavitesathikavita.blogspot.in/

बुधवार, १५ मे, २०१३

वाडीच्या रमणा l नृसिंह देवा l





तुझिया डोळ्यात l पहिली करुणा l
वाडीच्या रमणा l नृसिंह देवा ll ll
तुझिया कृपेची l एकच नजर l
भवाचा सागर l पार झाला ll l ll
कित्येक तरले l गतीस पावले l
भक्तीने जाहले l सुखी जन ll ll
जरी मी पतितl येताच शरण l
प्रेमे स्वीकारून l तारीयले ll ll

विक्रांत प्रभाकर
http://kavitesathikavita.blogspot.in/



कुणाला कळेना





कुणाला कळेना l माझे आचरण l
आवघे वागण l वेडगळ l  l
पिता पत्नी पुत्र l सारे हसतात l
मित्र लाजतात l भेटावया l  l
अहो भाग्य माझे l सारे जाती दूर l
एकांतात सूर l लागे छान l  l
असाच समज l व्हावा सर्वा इथे l
बुजगावणे ते l व्हावे खरे l   l
मग मी नादात l एकटा नाचत l
राहील गात l गीते त्याची l  l

विक्रांत प्रभाकर
http://kavitesathikavita.blogspot.in/



श्री जगन्नाथ कुंटे ऊर्फ अवधूतानंद यांना श्रद्धांजली

श्री जगन्नाथ कुंटे ऊर्फ अवधूतानंद यांना श्रद्धांजली   ******* पाहियले स्वामी अवधूतानंद शक्तिचा तरंग  उत्स्फुलित ॥१॥ पुत्र नर्मदे...