व्यापूनिया
********
व्यापूनिया जीवनालातू अशी राहिली आहेस
मज चिंब चिंब करणारा
तू आषाढ झाली आहेस ॥
आयुष्याचे गणित मज
कधीच कळले नाही
वजाबाकीत प्राक्तनाच्या
तू नशीब झालीआहेस ॥
आकडे बदलती दिवसाचे
पण सूत्र बदलत नाही
तीच होऊन सांज सकाळ
तू मनात ठसली आहेस ॥
येतात ऋतू नि जातात
रंग नभाचे बदलतात
स्मृतीमध्ये घन मेघांच्या
तू चंद्रकोर झाली आहेस ॥
किती भेटले मित्र मैत्रिणी
आठवतात कधी कुणी
मनी कायम रुणझुणती
तू गुणगुण झाली आहेस ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com .
☘☘☘☘ 🕉️
कोणत्याही टिप्पण्या नाहीत:
टिप्पणी पोस्ट करा