आदेश

आदेश

******

नाथ महाराज 

करा माझे काज 

सवे दत्तराज 

रूप दावा ॥१ .

विरक्तीचा अंश 

हृदयी  भरूनी

घ्या मज ओढूनी

पदावरी ॥२

अलख ओठात 

निरंजन मनी 

घाली मुद्रा कानी

पंथराज ॥३

आदेश कानात 

द्या हो माझे नाथ

विक्रांत मनात 

तळमळी ॥४

🌾🌾🌾

© डॉ.विक्रांत प्रभाकर तिकोणे 

kavitesathikavita.

☘☘☘☘ 🕉️ 

गोरक्षाची काठी

गोरक्षाची काठी

***************

गोरक्षाची काठी 

पडली डोक्यात 

टेंगूळ माथ्यात 

येऊनिया ॥

गोरक्षाची काठी 

पडे पेकाटात 

बसे बोंबलत 

आणिक मी ॥

बोंबललो असा

कानफाटा होत

जाऊन उलट

जीभ आत ॥

डोळे फिरवता 

श्वास अडकता 

पाठीत धपाटा 

पडला तो ॥

गोरक्ष धपाटा 

सुखाची उकळी 

पोटाच्या उखळी 

उतो येते ॥

उकळता नाद

दुमदुमे आत

आग नि पोटात

पेटतसे॥

असा हा  प्रवास 

पाहूनिया त्रास 

माऊलीचा श्वास 

ओलावला ॥

माऊली प्रेमाने 

भरविते घास 

सरतो सायास

भोगलेला ॥

गोरक्षाची काठी 

धरूनिया हाती 

उभारतो गुढी 

मग मीच ॥

विक्रांता गोरक्ष 

धावला पावला 

मस्तकी ठेविला 

कृपा कर ॥

****

डॉ.विक्रांत प्रभाकर तिकोणे 

https://kavitesathikavita.blogspot.com

नवनाथ कथा

नवनाथ कथा

**********:

का बरे कथेत 

देव हरविले 

गौण ते जाहले 

नाथा हाती ॥१॥

कळण्या आम्हास

नाही ते रे खास 

आप आपणास  

उद्धरावे ॥२॥

अवघे हे नाथ 

जहाले समर्थ 

धरुनिया पथ

साधनेचा ॥३॥

थकल्या वाचून

करा रे सायास

सांगती आम्हास 

आत्म शोधा ॥४॥

विक्रांती जाणले 

नाथांना पाहिले 

हृदयी धरीले

म्हणूनिया॥५॥

डॉ.विक्रांत प्रभाकर तिकोणे

https://kavitesathikavita.blogspot.com

श्री कानिफनाथ

श्री कानिफनाथ

***********

माझा कानिफा कानिफा

जन्म कुंजर कुहिरा 

असे मढीला निवास

भक्त रक्षक सोयरा

बाप जालिंदर गुरु

त्याची कीर्ती किती थोरू

लावी क्षणात भक्ताला

जन्म-मरणाच्या पारू

शिष्य अपार मेळावा

लाख-लाख झाले गोळा

त्यांस घेतले ह्रदया

काय वानू त्या कृपाळा

थोर नाथांची ती कथा

बळे जिंके हनुमंता

गुरु मुर्ती प्रकटुनि

रक्षी राजा गोपीचंदा

सखा गोरक्षाचा झाला

नाथपंथ वाढवला

शिष्य भित्री नि अस्थिर

प्रेमे धडा शिकविला

नाथ जागृत मढीला

उर्जा पर्वत जाहला

दीन गांजल्या जनाला

असे आधार जिव्हाळा

 **
डॉ. विक्रांत प्रभाकर तिकोणे
http://kavitesathikavita.blogspot.in

जालिंदर नाथ

जालिंदर नाथ
 **********
वैराग्य अग्निच 
जगी  प्रगटला 
धरेवर आला 
जालिंदर|| 

काय सांगू त्यांच्या 
वैराग्याची कथा 
क्षणी राजसत्ता 
लाथाडली  || 

संसार समस्त 
जाणुनिया व्यर्थ 
जाहला प्रबुद्ध 
अंतर्यामी|| 

निर्जर वनात 
निर्भय होऊन 
निजाचे कल्याण 
शोधतसे|| 

असुनी मदन 
जाहला संपूर्ण 
वैराग्य संपन्न 
अग्नीसवे|| 

स्वयम् अग्नीदेवे 
तयाला वाहिले 
दत्तपदा नेले 
शिष्यत्वास ||

दत्तकृपा पूर्ण 
जाहला सज्ञान 
कृतार्थ जीवन 
सारे केले || 

कानिफाचे नाथ
झाले गुरुनाथ 
वाढविला पंथ
दाही दिशी ||

ऐसा तपी थोर
नाथ जालिंदर 
तया माथा भार 
वायु वाहे  || 

मैनावती तात 
असूनी समर्थ 
राहिला लीदीत 
समाधिस्थ  ||

क्रोधाच्या कौतुकी   
जाळल्या त्या मूर्ती 
गोपीचंदा अंती 
नाथ केले  ||

अहो कृपा मूर्ती 
नाथ जालिंदरा
घेऊनी अंतरा  
वास करा  ||

मागतो विक्रांत 
तुम्हाला वैराग्य 
करा पदा योग्य 
महाप्रभू  || 

© डॉ.विक्रांत प्रभाकर तिकोणे
 http://kavitesathikavita.blogspot.in

3/2/20

दर्शन

दर्शन
******

कृपेने दर्शन
आले ते घडून
प्रेमाने भरून
मन गेले ॥
अहो महाराज
बसवले पंक्ती
नसुनिया शक्ती
दान दिले ॥
क्षण सहवास
स्नेहाने दिलात
सुख हृदयात
उमलले ॥
घडे ना भाषण
साधना सांत्वन
उपदेश हान
शब्दे काही ॥
परि मी पातले
अंतरी जाणले
नाथे अंगीकारले
कृपा मूर्ती ॥
विक्रांत नाथाचा
जन्म ऋणाईत
बांधी खूणगाठ
मनामध्ये॥
.....
डॉ.विक्रांत प्रभाकर तिकोणे
http://kavitesathikavita.blogspot.com

श्री गहिनीनाथ

खेळता गोरक्ष 
घडली करणी 
उद्भवे गहिनी
मातीमध्ये 

भिवून बालके 
भूत त्या म्हणून 
बसले लपून 
घरामध्ये  

तो करभाजन
मच्छिंद्रे जाणून 
हृदयी धरुन
प्रेम दिले 

घडवून याग
देव संगतीत 
गहिनी पंथांत 
नाथ केले 

गहनीने थोर 
निवृत्ती तो केला 
ज्ञानेश दिधला 
महाराष्ट्रा 

 नाथपंथाच्या या 
गहिनी फांदीला 
बहर हा आला 
वारकरी 

मराठी देश हा 
ऋणी गृहिनीचा 
जिव्हाळा जीवाचा 
पुरविला 

विक्रांत गहिनी
पदास नमतो 
पायधुळ  घेतो 
माथ्यावरी

 © डॉ.विक्रांत प्रभाकर तिकोणे
https://kavitesathikavita.blogspot.com

गोरक्षनाथ

गोरक्षनाथ
*******

जन्म राखेतून झाला
कधी लिप्त न कशाला
काम क्रोध लोभ मोह
कधी जाती ना वाट्याला

असा गोरक्ष तपस्वी
थोर जाहला जगती
नाथपंथी मिरवला
जणू स्वयं की धूर्जटी

भ्याला गर्भवास ज्याला
नाथपंथाचा तो चेला
गुरू पदाचा अढळ
ध्रुवतारा नभातला

गुरू प्रेमासाठी ज्याने
अक्ष क्षणात तो दिला
केली परीक्षा उत्तीर्ण
नग सोनियाचा केला

नारी राज्यात जाऊन
गुरू मच्छिंद्र आणले
आर्त जनावरी साऱया
थोर उपकार केले

परिसीमा वैराग्याची
असे अवधी तपाची
मुर्त साकार प्रेमाची
तात मात गहिनीची

तो हा गोरक्ष सोयरा
सदा राहो मनामाजी
धूळ विक्रांता किंचित
लागो तयाच्या पायाची




© डॉ.विक्रांत प्रभाकर तिकोणे
http://kavitesathikavita.blogspot.in

मच्छिंद्रनाथ

मच्छिंद्रनाथ

***
श्रीमच्छिंद्रनाथ यती 
जरी पुत्र धीवराचा
म्हणे प्रेमे पंथ अंश
कवी नारायणाचा

थोर कुणीही जन्माने
नसतो इथे कधीही
दाविले स्वतेजे त्यांनी
जिंकूनिया देव मही

जनतेच्या सुखासाठी
तपी अनंत कष्टाला
शाबरी ती मंत्र विद्या
दिली आर्त जगताला

नवे मंत्र नवे तंत्र
उभारला नाथ पंथ
तया दिले देवपण
निर्मियले नवे वेद


जाती पाती मोडूनिया
बहुजना गुरू केले
देवतत्त्व हरवून
यत्न सिद्ध मिरविले

असा थोर बंडखोर
कृपा करी जगावर
मातीतून राखेतून
घडविले अवतार
**

© डॉ.विक्रांत प्रभाकर तिकोणे
http://kavitesathikavita.blogspot.in

मच्छिंद्र नाथ

मच्छिंद्र नाथ
**********
काठावरती तडफडती
मत्स्य पाहुन द्रवला जती

क्षणभंगुर हे जीवन किती
आले त्यांच्या क्षणात चित्ती

सुवर्ण क्षण तो मग वेचूनी
चालू लागला साधना पथी

घोर कष्टाला तपात बहुती
होय अर्ध्वयु  मग नाथपंथी

आदिनाथबीज हृदयी पडले
अवधुताने त्या प्रेमे सिंचले

वटवृक्ष ये आकार बीजाला
अगणित जीवा ठाव मिळाला

जातीभेद ते सारे मिटले
 वर्णपंथ अन एक जाहले

मानवतेच्या पायावरती
देवुळ एक उभे राहीले
**
(c) डॉ.विक्रांत प्रभाकर तिकोणे
https://kavitesathikavita.blogspot.com

मुक्ती

मुक्ति

डोईवर हात

ठेवूनिया मुक्त

कुणी काय होत

ध्यानी घे रे ॥

तुझे तुझे आहे

चावण्याचे अन्न

करणे पोषण

देहाचे या ॥

चालायचे दूर

आधी पायावर

उभा राही बरं

धडपणे ॥

नाथांचिया खुणा

घ्याव्यात जाणून

द्यावे ओवाळून

सारे काही ॥

विक्रांता कळले

शहर टाकले

क्षितीज दिसले

मनोहर ॥

डॉ.विक्रांत प्रभाकर तिकोणे

http://kavitesathikavita.blogspot.in