श्री शिव छत्रपती

श्री शिव छत्रपती महाराजांना
**********************

माझ्या राजा
तुझ्यासाठी
वाहिन मी
जीव पथी

आयुष्याची
कुरबानी
पुन्हा पुन्हा
करीन मी

पुन्हा येई
जन्म घे
खरा अर्थ
राष्ट्रा देई

देव देश
धर्मासाठी
येई राजा
आम्हासाठी

तुझे नाव
घेणारे ही
उरले ते
तुझे नाही

तुझे नाव
झाले इथे
एक नाणे
खणाणते

आणि आम्ही
तयाला रे
सदोदित
विकलेले

तुझा ध्वज
चारी खांदी
आडवीच
परि फांदी

जयकार
पेटीसाठी
खजिन्यात
कोटी-कोटी

लुटलो रे
तुझ्यासाठी
लुटणार
तुझ्यासाठी

एकदाच
पुन्हा येई
ह्रदयांत
अाग होई

विझणार्‍या
राष्ट्राला या
संजीवन
पुन्हा देई

डॉ.विक्रांत प्रभाकर तिकोणे
https://kavitesathikavita.blogspot.com

।। शिवराय ।।

।। शिवराय ।।

शिवराय हे दैवत आमुचे   

नाहीत आणिक कुणाचे   

न हाती झेंडा घेणार्‍याचे  

न पुतळा उभारणार्‍याचे

शिवराय ना मतपेटीचे

याच्या त्याच्या वा जातीचे   

टिळा लावून हिंडणार्‍या  

त्या ऐर्‍या गैर्‍या गुंडाचे  

शिवराय इथल्या मातीचे

रुजलेल्या कणाकणाचे

मनामनात भिजल्या

निस्सीम भावभक्तीचे

शिवराय दैवत या देशाचे

महान प्रतीक स्वातंत्राचे  

पाय रोवून फडफडत्या

भगव्या जरी पटक्याचे

शिवराय मर्द तान्हाजीचे

शिवराय बाजी देशपांडेचे  

शिवराय मदारी मेहतरचे

शिवराय कान्होजी आंग्रेचे  

शिवराय नाव सागराचे

पवित्र भीमा नि कृष्णेचे

उभ्या ठाम सह्याद्रीचे

हिंदूराष्ट्र महापुरुषाचे

शिवराय आडनाव प्रत्येकाचे

शब्द मराठी बोलणार्‍याचे

बाहू बाहुत स्फुरणार्‍या

जिगरी मरहट्ट रक्ताचे

शिवराय सन्मान या मातीचा

शिवराय शिरपेच या देशाचा

शिवराय प्राणात गरजणारा

जयघोष मराठी आस्मितेचा

मी मानी शिवरायाचा

अभिमानी महाराष्ट्राचा

ओवाळतो सदैव तया

करुनी दीप प्राणाचा  

© डॉ..विक्रांत प्रभाकर तिकोणे
http://kavitesathikavita.blogspot.in

हे माझ्या शिवछत्रपती राजा

हे माझ्या शिवछत्रपती राजा
जेव्हा ते तुमचं नाव घेवून
आमच्या समोर येतात तेव्हा..
त्यांची कार्यशैली
पाहिल्या वाचून
नीट जाणल्या वाचून
आम्ही त्यांना आपला मानतो
कदाचित त्यांना
काही सोयर सुतकही नसत
तुमच्या गौरवशाली नावचं
श्रेयाच पराक्रमाचं
त्यांना हवं असतं एक नाव
आपल्यावर शुचिर्भूतेचा शिक्का मारायला
अन त्याचं ते उदिष्ट पूर्णही होतं
कारण तुमचे नाव ऐकताच
आमचा हात थबकतो
श्वास थांबतो
कणकण नम्र होतो.
आम्ही तुम्हाला विकले गेलेलो आहोत
तुमच्या नावावरच मोठे झालेलो आहोत
आमच्या रक्तातील तुमचे असण
हे आमचे बलस्थान आहे अन
एक मर्मस्पर्शी कमजोरीही
विक्रांत प्रभाकर
http://kavitesathikavita.blogspot.in/

भगवा माझा

निळ्या आकाशी फडफडणारा

जरी पटक्यातील भगवा माझा ||

शिवरायांच्या पराक्रमाचा

नीतीयुक्ती अन दूरदृष्टीचा

कृतार्थ हिंदू तप्त मनाचा

हुंकार हसरा भगवा माझा ||

समर्थांच्या कृपाबळाचा

ज्ञान वैराग्य आदर्शाचा

पिढ्यापिढ्यांनी सांभाळला

जागृत वसा भगवा माझा ||

तोरणगडी फडफडला जो

अटक पार करुनी आला

बुलुंद मराठी अस्मितेचा

कणा ताठ हा भगवा माझा ||

अजून ध्वज तो फडफडतो

जगण्याचे मज बळ देतो

वादळ वारे ऊन झेलता

पाठीराखा हा भगवा माझा ||

विक्रांत प्रभाकर

http://kavitesathikavita.blogspot.in/

राजांच्या नावाला विसरली आहेत ||

माझी ही मानसं

विटाळली आहेत

राजांच्या नावाला

विसरली आहेत ||

दुहीच्या द्वेषात

आपसात भांडत

मराठी मातीला

विसरली आहेत ||

सत्तेच्या मदाने

मातली आहेत

धनाच्या ढिगाला

हपापली आहेत ||

बोलणे माझे हे

ऐकणार नाहीत

मला ही कदाचित

ठेवणार नाहीत ||

परी मजला हे

ठावूक आहे

नावात त्या किती

ताकद आहे ||

पेटेल ज्वाला ती

पुन्हा धडाडून

जाईल हिणकस

अवघे जळून ||

विक्रांत प्रभाकर

http://kavitesathikavita.blogspot.in/