अशनी

तुझ्या झिडकारण्याचा

एक दगड
माझ्या दुःखाच्या
उंच ढीगावर पडला
किंचितसा
आवाज झाला
अन कुणाला
पत्ता ही न लागला
का प्रत्येक चांदणी
माझ्या मनातील
अशनी होऊन
खाली पडणार
हे माहित असते
या जगाला

विक्रांत प्रभाकर

http://kavitesathikavita.blogspot.in/

मेलेल्या बकऱ्याला

मेलेल्या बकऱ्याला

नाव नसते गाव नसते
घर नसते दार नसते
प्रत्येक बकरा असतो
प्रथिनाचा ढीग
चविष्ट रुचकर
भूक वाढवणारा
चव जागवणारा
त्याचे हुंदडणे बागडणे
दुध पिणे चरणे
शिंग खाजवणे
सहज पुसून टाकता येते
विस्मृतीच्या फडक्याने
एका क्षणात
मालकाला धन मिळते
कसायाला फायदा
खाणाऱ्याला सुख ..
जन्मलेल्या प्रत्येक जीवाला
मृत्यू हा असतोच
असा नाहीतर तसा
त्याच्या देहाचे जन्माचे
सार्थक झाले
चला पान खावून येवू यात !

विक्रांत प्रभाकर
http://kavitesathikavita.blogspot.in/

देखणी

ती सुंदर गोरीपान

नाक डोळे छान असलेली

सुडौल तरुणी

अलीकडेच लग्न झालेली

सौभाग्याची लेणी नवी

देही मिरवणारी

जेव्हा काढू लागे

रस्त्यावरील कचरा

मुन्सिपाल्टीच्या गणवेशात

घेवून खराटा हातात

येणाऱ्या जाणाऱ्या असंख्य नजरा

उंचावत थबकत तिला न्याहाळत

काहीश्या नवलाने अचंब्याने

आणि खूपश्या वैषम्याने

अन जाता जाता बरेचसे ओठ

उगाचच वाकडे होत

ती सराईतपणे

इकडे तिकडे पहिल्या वाचून

आवरत असे आपले काम

जोडीदारीनीला देत साथ

एक एक ढीग उचलत

ढकल गाडी पुढे सरकवत

अन माझ्या डोक्यात

कुठेतरी ऐकलेले ते वाक्य

पुनःपुन्हा तरळून जाई

“नक्षत्रावानी देखणी

आहे माझी पोर

नक्कीच सजवीन

कुण्या राजाचं घर “!

विक्रांत प्रभाकर

http://kavitesathikavita.blogspot.in/

येशू आणि धर्मांतर

गोठ्यात जन्मलेला

क्रुसावर वधला गेलेला

येशू ख्रिस्त ..

तुमच्या आमच्या सारखा

खराखुरा माणूस

पण प्रभूप्रेमाने मस्त झालेला

आत्मभान आलेला

अवलिया ...

तत्वासाठी मृत्यू स्वीकारणाऱ्या

विरळया माणसांपैकी

एक अलौकिक व्यक्तिमत्व ...

त्याचे देवत्व वादातीत आहे

परमहंसागत..

पण धर्मांतर हा शब्द

त्या महात्म्याला

माहित असेल की नाही

या बद्दल मला शंकाच आहे

विक्रांत प्रभाकर

http://kavitesathikavita.blogspot.in/