खोके

खोके

*****

दत्ताच्या द्वारी आपटून डोके 

रिते कर खोके ज्ञानाचे ते ॥

अगा भरलेला आतमध्ये भुसा 

कोण जाणे कसा ठासूनिया ॥

काही भिजलेला काही कुजलेला 

काही घट्ट झाला कशाने तो ॥

कळत कधी वा कधी न कळत 

राहिला भरत व्यर्थपणे . ॥

घेई भाव फुले ठेवी रे तयात 

धुंद आसमंत करूनिया ॥

रोज होई रिक्त रोज होई मुक्त 

महा शून्य भक्त परिपूर्ण ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

घ्यावे जगून

घेई जगून

********

जाण्याआधी हातातून 

जीवन आपल्या निसटून 

आषाढाचा पाऊस होऊन

धुंदपणे  घ्यावे जगून 

क्षणोक्षणी आनंदाचे 

झरे येतात उफाळून

 दगड थोडे माती थोडी 

ठेव जरा बाजूस करुन . 

फार काही अवघड नाही 

फक्त प्रवाही वाहत राही 

प्रवाहातील प्रतिबिंबात 

हरखून आणि हरवून जाई 

मैत्र भेटतील कधी जीवाचे 

जीव त्यावर देई उधळून 

सुखदुःखाचे क्षण इवले 

घे तयाला घट्ट कवळून 

भय पापाचे अन पुण्याचे 

होत निरागस दे उधळून 

पद प्रतिष्ठा जा विसरून 

आनंदाचा कण तू होऊन 

जे लाभले त्या कृतज्ञ होऊन 

जे गेले त्या निरोप देऊन 

या क्षणातील चिरंतनाशी 

नाते आपले घेई जुळवून

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

दत्त शब्द

दत्त शब्द

*******

दत्त दत्त दत्त दोन शब्द फक्त 

राहो अंतरात निनादत ॥१

दत्त दत्त दत्त हृदयी स्पंदन 

राहो कणकण उद्गारत ॥२

दत्त दत्त दत्त सोहम श्वासात 

सहस्त्रवारात वसो नित्य ॥३

दत्त दत्त दत्त पडावे कानात 

स्वर अनाहत स्वयंपूर्ण ॥४

दत्त दत्त दत्त व्हावे निजरूप 

भरून स्वरूप  नुरो अन्य ॥५

दत्त दत्त दत्त शब्द कृपावंत 

विक्रांत मनात रुजो खोल ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

होशी दत्ता

होशील दत्ता

*********

कुणासाठी होशी दत्ता तू रे देव 

स्वीकारशी भाव हृदयीचा ॥१

कुणासाठी होशी दत्ता तू रे बाळ 

कृपाळ प्रेमळ लीलाधर ॥ २

कुणासाठी होशी तूच गुरुदेव 

उपदेशी ठाव पदी देशी ॥३

कुणासाठी धावे रक्षक होऊन 

विपत्ती हरून तारी कुणा ॥ ४

कुणासाठी सखा होशी सवंगडी 

देई लाडीगोडी सुख सारे ॥ ५

माझ्यासाठी कधी होशील तू मी रे

हरवून सारे दृश्यभास ॥ ६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

सुटू द्यावे

सुटू द्यावे

*******

असते सदैव 

साथ का कुणाची 

सुटतात हात सुटू द्यावे ॥

खेळ जीवनाचा 

पहायचा किती 

मिटतात डोळे मिटू द्यावे ॥

हातात नभाच्या 

असतेच काय 

फुटतात मेघ फुटू द्यावे ॥

येता ऋतूराज 

फुलतात वृक्ष 

जगतास गंध लुटू द्यावे ॥

सरताच ऋतू 

गळतो बहर

विटतात रंग विटू द्यावे ॥

येताच भरून 

सुचतेच गाणे 

हृदयात दुःख उमटू द्यावे ॥

सुखाचे दुःखाचे 

चीर जीवनाचे 

मनाला तयात लपेटू द्यावे ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

दत्त बडवतो

दत्त बडवतो

*********

दत्त बडवतो मज बडवू दे 

दत्त रडवतो मज रडवू दे 

फटका बसता जागृती येता

कुठे जायचे मज कळू दे  ॥१

प्रवाही वाहून फुटणे घडते

छन्नी साहून आकार उमटे 

चुकता चुकता चुकले कळते 

मागचे मागुते मग सरू दे ॥२

आईचे मारणे मारणे दिसते 

प्रेमच त्यात ना दडले असते

जन्म जन्मीचे साठले वाढले

कृपेने त्याच्या प्रारब्ध सुटू दे ॥३

जयाच्या संकल्पे विश्र्व जन्मते

आणिक विकल्पे लयास जाते

तयाचे सुखकर आनंद गर्भ ते

दुःख इवलसे येवून भिडू दे ॥४

देह ना माझा नच हे मन ही

भोगणारा सदा पाहत राही 

पाहता पाहता आकाश मधले

पाहण्याऱ्याल्या गिळून घेवू दे ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

मारूत

मारुत

****** 

एक रुद्र हुंकार 

भेदत जातो सप्त पर्वत 

पृथ्वी आप तेज वायू 

सारे आकाश व्यापत 

थरथरते धरती ढवळतो सागर 

उफाळून लाव्हाग्नी 

स्थिरावतो नभावर 

मग शब्दांचे पडघम वाजवत 

डम डम डम करत 

जातो विस्तारत ओमकार होत 

त्या परमशून्याला 

कडकडून भेटत

आपले अस्तित्व हरवत 

तो राम आराम विश्राम 

त्याच्याशी एकरूप होत 

मग उतरतो खाली 

असले पण हरवत 

आपले पण मिटवत 

ती महाभक्ताची न मागितलेली 

बिरुदावली मिरवत

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

महापुरुष

.महापुरुष 

****

महापुरुष बरे असतात 

जन्मदिवस पुण्यतिथी 

साजरे करण्यासाठी 

हार माळा फुले 

फोटोवर पुतळ्यावर

उधळून गाणी गाण्यासाठी 

महापुरुषाचे विचारधन 

नको असते कोणाला

जातीजमातीत वंशात 

उभा करून त्याला 

राहायचे असते लोकांना 

कारण आकाशात उडून 

अथांग आकाश होता 

येत नसते त्यांना 

तो त्याग ती तपस्या ते दुःख 

ती वेदना झेपत नसते त्यांना 

खरंतर कधी कधी ती 

एक गरजही असते त्यांची 

आपले इवलाले स्वार्थ 

महत्त्वकांक्षा पुऱ्या 

करून घेण्यासाठी

एक कळप एक झुंड 

एक दहशत निर्माण करण्यासाठी 

बऱ्याच वेळेला 

त्या झेंडा खाली जमणे 

हे नाईलाजाचे असते 

एक ओढवून घेतलेली 

जबरदस्ती असते त्यांच्यावर 

कारण जीवनाचे 

बळी तो कान पिळी 

हे सूत्र भिववत असते त्यांना 

हे सूत्र माहीत असते त्यांना 

दिसत असते त्यांना 

म्हणूनच महापुरुषाचे प्रतिमापूजन

 हे एक बळाचे साधन 

म्हणून स्वीकारून

 प्रत्येक वंश धर्म समाज गट 

स्वतःलात फसवून

त्यांचा अनुयायी म्हणून 

मिरवत असतात

अन त्या युगपुरुषाला खुजे करून 

तट बांधत असतात पुढारी 

दऱ्या वाढवत असतात राजकारणी 

साऱ्यांनाच दिसत असते 

कळत असते  

पण स्वार्थापुढे कोणाचेच 

काही चालत नसते

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

आरसा

आरसा

******

तुझिया डोळ्यांनी मीच मला पाहतो

वादळ संवेदनांचे कणाकणात वाहतो 

कविता तुझ्यावरच्या  लिहून खुश होतो 

मी तुला खुश करतो का मीच खुश होतो 

तू सुखाचा आरसा समोर माझ्या ठेवला सुखदुःखात तुझ्या माझाच चेहरा नटला 

हे असणे कुणासाठी हे नसणे कुणाविन 

ते चांदणे कुणातील मज वेढून रात्रंदिन

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

तुझ्यासाठी

तुझ्यासाठी

*********

मनावरी गोंदलेले नाव तुझे हळुवार

सांग तुला दावू कशी प्रेम खूण अलवार ॥१

डोळ्यातील चांदण्यांना तुझ्या पथी अंथरते 

भावनांची भावफुले शब्द गंध शिंपडते ॥२

सांग कसे लपवू या देहातीला खाणाखुणा 

कसा बाई अडखळे शब्द ओठी फुटतांना ॥३

तुला डोळी पाहतांना काळजाचे पाणी होते 

तुझा स्पर्श होता क्षणी भान देहा पार जाते ॥४

मिटता च डोळे तुझे दिव्य रूप साकारते 

उघडता व्याकुळता गालावरी ओघळते ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

भक्ताचिया गोष्टी

भक्ताचिया गोष्टी

**************

भक्ताचिया गोष्टी डोळा आणी पूर 

भावनांनी उर भरू येई ॥१ 

आहाहा किती रे भाग्याचे पाईक 

पातले जे सुख पायी तुझ्या ॥२

किती भाव भक्ती किती समर्पण 

अर्पिले जीवन ज्यांनी तुला ॥३

तयांच्या पदाची धूळ घ्यावी भाळी 

भक्ती भारलेली कणभर ॥४

अशा वेडाविन काय तू रे भेटे 

सुटतील वेढे जन्माचे या ॥५

ऐसिया भक्तांची सदा पडो गाठ 

दिसो तुझी वाट मजलागी ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

श्रीराम प्रार्थना

श्रीरामास प्रार्थना

**********

अयोध्येत पुन्हा विराजमान झाल्यानंतर 

हे रामराया, हा तुझा पहीला जन्मदिवस 

अतिशय गौरवशाली मूल्यवान 

आणि तो पाहणारे आम्हीही भाग्यवान 

खरंतर जन्मदिवसाचे अभिष्टचिंतन करून 

भेट द्यायची असते उत्सव मुर्तीला

पण मी मात्र बोलणार आहे तुझ्याशी 

आणि मागणार आहे तुझ्याकडून काहीतरी .

अनंत कालरुपी सत्तेने अस्तित्वात 

असलेला तू

तुझ्या हिशोबी हा काळ असेल .

टिचभर इवलासा .

पण आमच्या कित्येक पिढ्यांची

शेकडो वर्षांची भरभळ वाहणारी 

दुःख देणारी जखम होती ही

निदान यापुढे तरी आमच्यातील 

निर्लज्ज स्वार्थी सत्तांध उपद्रवी 

तसेच  तथाकथित पुरोगामी वगैरे 

असलेले आमचेच बांधव 

त्यांना तूच बुद्धी दे 

तुझे मुर्त स्वरूप असणे 

तुझे अमूर्त असणे 

आणि तुझे जनमानसात 

विराजमान असणे

 हे त्यांना कळू दे

तुझ्यापासून दुरावलेले तुटलेले 

रागावून गेलेले 

किंवा हिरावून नेलेले तुझे भक्त 

त्यांचा तू पुन्हा स्वीकार कर 

त्यांचा पदरात घे .

सत्व राखणे त्यासाठी बलशाली होणे 

एकत्र राहणे मित्र जोडणे आणि वेळ येतात 

रिपू दमन करणे हे  तुझे सूत्र 

प्रत्येक मनात जागृत राहू दे 

वर्ण जाती भाषा वेष राज्य प्रदेश 

याच्या सीमा पुसून जाऊ दे

तुझे मंदिर अक्षय अबाधित राहू दे 

आणि त्यावर फडफडणारी ध्वजा 

दशो दिशातून दिसू दे

 तुझ्या कृपेने आत्मोध्दार जगदोद्धार

आणि विश्वोद्धार होवू  दे हिच प्रार्थना

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

मी आहे

मी आहे

*******

पुंज क्षणाचे मनात दिसले 

जणू अवसेला तारे तुटले ॥

प्रदीप्त मी पण नच मिटणारे

उंच टोक जणू ज्वालेवरले ॥

तीच लाट जणू पुढे धावते 

पळ सातत्य खुळे वठवते ॥

सापेक्ष्याची परि ती किमया 

कळणाऱ्याला हवी कळाया ॥

 या क्षणातच मी पण असते 

जगताचे गूढ द्वार उघडते ॥

माझ्या वाचून जे गीत उमटते

अस्तित्वाचे ते गुंजन असते ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

ऐकणरे भेटते तेव्हा

ऐकणारे भेटते तेव्हा

******

जेव्हा कोणी ऐकणारे भेटते तेव्हा 

शब्दांनी भरून येते आकाश अन 

कोसळते अनावर होऊन

थांबवल्या वाचून थांबल्यापासून 

मग पेशी पेशीत दडलेली गुपिते 

उलगडतात ओठावर आपसूक येवून

नाचू लागतात कारंजी बोलण्यातून

 सुखाची दुःखाची अनुभवाची 

काल घडलेल्या प्रसंगाची 

उद्याच्या समायोजनाची 

हळूहळू पोतडी खाली होत असते 

भरलेल्या उधानल्या मनाची 

जेव्हा कोणीऐकणारे भेटते तेव्हा 

भावनांनी भरून येतो मोहर 

मंद मदीर गंध पसरतो आठवांचा 

अगणित अद्भुत विभ्रमांनी 

भरून जाते वर्तमान 

माझे बोल ऐकता ऐकता 

जेव्हा माझेच होते तुझे मन 

बोलणे थांबते जाते थबकून

ओसंडून वाहणाऱ्या प्याल्यागत 

संतृप्ततेचा किनारा गाठून 

आणि तरीही तू उगाचच विचारत असते 

मग अजून मग अजून. . .

तृप्तीच्या शिखरावरील अतृप्त मेघ होऊन

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

याचक

याचक

*******

दत्त दारीचा याचक 

काय सांगू त्याची मात 

जय लाभ यश कीर्ती 

असे तयाच्या हातात ॥

जाता दत्ताला शरण 

चुके जन्म नि मरण 

देह उरला नुरला 

कैसे काय ते स्मरण 

जाणे तयाच्या दारात 

भाग्य असे रे जन्माचे 

पडो झोळीत काहीही 

दान मागावे भक्तीचे 

हट्टी होई रे भिकारी 

रहा अडुनिया दारी 

एकरूप त्या होवूनी 

सरो निघणे माघारी

जन्मा आल्याचे फळ 

दत्त दत्तची केवळ 

तया वाचून असती 

लाभ अवघे निष्फळ

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

भाग्यवान

भाग्यवान

*******

तुझी आठवण येते उसवून 

माझ्या मनातून मला चूकवून ॥१

खोल खोलवर बसले दडून

वादळ स्मृतीचे येथे उफाळून ॥२

जनात अलिप्त ते तुझे असणे 

सर अमृताची क्षणाचे पाहणे ॥३

हसल्या वाचून आनंद पेरणे

वदल्या वाचून अपार सांगणे ॥४

आणिक भेटता ते तुझे मी होणे

स्पर्शात चांदणे आभाळ भरणे ॥५

मानावे कुणाचे आभार मी आता

होतो भाग्यवान पदासी चुंबिता ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

 

स्वामी समर्थ

श्रीस्वामी समर्थ

*********

स्वामी अक्कलकोट वाला

मैं हूं उनका चेला 

सर पर है आशीष उनके 

हो गया बेड़ा पार मेरा ॥

कौन जान सकता उनको 

छाती ठोककर भला 

उतर आया कैलाश से 

सांब सदाशिव भोला ॥

पाकर मिट्टी पदकमलों की 

संसार हो गया सुहाना 

और दृष्टिके अमृतकणसे

यही मोक्षमय  जीना ॥

कोटि-कोटि हाथो में

लेकर प्रेम प्रसाद 

दे दे प्रसन्न भक्तो को 

जब कर ले वह याद ॥

गया नही मै दूर कही

 हूं हमेशा यहॉ जिंदा 

व्याकुल मनसे पुकार लो

आऊंगा मैं ,उनका वादा ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

अधिष्ठान

अधिष्ठान

********

माझिया भक्तीची नको रे प्रचिती 

देऊस पावती दिगंबरा ॥१

काय हा व्यापार चाले व्यवहार

एक एकावर देणे घेणे ॥२

माझिया मनात नुठावे मागणे 

ऐसे तैसे होणे कदा काळी ॥३

घडावे जगणे मध्यम मार्गाने 

तुझिया पंथाने येणे जाणे ' ॥४

असावे अंतरी पूर्ण समाधान

तुझे वस्तीस्थान मनोहर ॥५

घडो हवा तर काही नामजप

काही ध्यान तप तुझी मर्जी ॥६

परीअधिष्ठान जावे न सुटून 

विक्रांत मोडून पडू नये ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

भांडे

फुटके भांडे

*****

फुटक्या भांड्याचा सोस भरण्याचा 

तैसा कळण्याचा मार्ग जीवा ॥

भांड्यावर भांडे पडूनिया भांडे 

भरेनाचि भांडे काही केल्या ॥१

सारे साचलेले सरुनिया जाता

ठणाणा कोरडा स्वर उरे ॥२

कळे भरण्याची व्यर्थ उठाठेव 

सरे धावाधाव मग त्याची ॥३

होईल लिंपण मोडीत वा जाण

ठाऊक प्राक्तन नसे कोणा ॥४

जाता भांडेपण विसरून भांडे 

शून्यातले धडे गिरवीत ॥५

आतले बाहेर एकच आकाश 

असण्याचा भास अस्तित्वाला ॥६

विक्रांत आकांत कळे भरण्याचा

येण्याचा जाण्याचा मार्ग नाही ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

कैवारी

कैवारी

******

जाणिवेचा डोळा नभाने गिळला

सूर्य वितळला डोईवर ॥१

एक एक पान जळले प्रेमाने

वसंताचे गाणे गात ओठी ॥२

आयुष्य टांगले होते खुंटीवर 

झटकून धूळ नेसू केले ॥३

गेले मिरवित असण्याचे भान 

उमटली तान मणक्यात ॥४

दिसे अहंकार उभा पायावर 

कुबड्याचा भार जन्मावर ॥५

हरवला प्राण वाजवे बासुरी 

श्रीपाद कैवारी गुंजनात ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

जुगार

जुगार

***

खेळतो जुगार तुझिया नावाचा 

 जन्म मी हा माझा 

लावून पणा ॥१

प्रारब्धाचा पक्ष जरी बळकट 

सारी सारा सारीपाट

त्याचा जरी ॥२

तया सारे ठाव पुढील ते डाव 

जिंकणे हवाव 

सदा तया ॥३

माझ्या पाठीराखा परी असे दत्त 

त्याचे महाद्युत 

कुणाकळे॥४

मनी असे खात्री हरेल प्रारब्ध 

जिंकेल श्रीपाद 

श्री वल्लभ ॥५

सारे लिहिलेले पुसतील लेख 

भक्तीची ती मेख 

कळू येता ॥६

भक्तीसाठी भक्ती प्रीतीसाठी प्रीती 

श्रीपादाचे प्रति 

नित्य घडो ॥७

आणिक विक्रांता काय ते जिंकणे 

श्रीपादाचा होणे 

जन्मभर ॥८

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

भान

भान

*****

चांदण्याचे 

तुझे हात 

लखलखतात 

माझ्या मनात  ॥

स्पर्श अमृताचे 

ओघळतात 

आतुरल्या

कणाकणात ॥

आल्याविना 

येतेच तू 

गेल्या विना 

जातेस तू ॥

हरवते जीवन 

हरखते जीवन 

तुझ्याचसाठी 

सजते जीवन ॥

प्रकाश प्राशून 

माझा प्राण 

होतेस तूच

हरपून भान ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

श्रीपादराजम शरणं प्रपदे

श्रीपादराजम्  शरणं प्रपदे

******************

श्रीपाद भक्ताचा असे पक्षकार 

करितो सांभाळ रात्रंदिन ॥

जरी येती दुःख प्रारब्धा अधीन

लावी विटाळून सारी प्रभू ॥

जगी दुष्ट शक्ती राहती लपून 

वेष पालटून येती कधी ॥

छळती गांजती भक्तां रडवती 

परीक्षाच घेती जणू काही . ॥

परि जो शरण श्रीपादा केवळ 

तयाचे सकळ इष्ट होते ॥

इह पर लोक दोन्हीही साधती 

सुख वर्षताती अप्राप्यही ॥

विक्रांत शरण श्रीपाद पदाला 

परिस लाधला पूर्व पुण्ये ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

आमीष

आमीष

*******

थोडी ढील देते ती त्याला थोडे जवळ खेचते

पुन्हा ढील देऊन दूरवर जाऊ देते 

पण आहे ना गळ घट्ट रुतलेला 

सदैव काळजी घेते 

तोंडात धरून आवडीचे आमिष

जितं मया म्हणत मीनाची स्वारी निघते 

तो तिचा खेळ किती वेळ चालणार 

कोणास ठाऊक 

पण जीवनात रंगत आणते 

त्याच्या आणि तिच्याही 

कारण तो आहे म्हणून गळ आहे 

आणि गळ आहे म्हणून ती आहे 

पण जर तीच नसती तर गळही नसता 

आणि तो मासा त्याचा जन्म मरणाचा 

सुखदुःखाचा खेळही नसता 

तसे तर सागरात लक्षावधी मीन असतात 

सारेच कुठे आमिषाला भुलतात 

साऱ्यांनाच कुठे सुखं मिळतात 

आणि सारेच कुठे गळाला लागतात 

पण जे गळात अडकतात 

त्यांनाच प्रश्न पडतात 

त्यांचेच प्राण पणाला लागतात 

म्हणून खरोखर तेच भाग्यवान असतात

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️ 

उंबरा तळी

 उंबरतळी

*******

मनी पांघरून दत्त 

खुळे जग विसरतो

वाटा सोडून श्रेयाच्या 

तळी उंबरी बसतो ॥१

येतो शितलसा वारा 

जलकण शिंपडतो 

जणू हलकेच दत्त 

कमंडलू हिंदळतो ॥२

गंध गोडस मदीर 

आसमंतात व्यापतो 

फळ एक-एक मधु 

क्षुधा तृषा भागवतो ॥३

साऱ्या विसरती व्यथा 

अणू रेणू शांत होतो

मन उन्मन होवून

दत्त नामात रंगतो ॥४

त्याचा सोवळा सोहळा 

जरा दुरून पाहतो 

आत हसतसे दत्त 

संगे ओवळा नाचतो ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️