संसार

संसार

****

संसार सरेना भोगणे ठरेना 

जगणे पुरेना उपाधीला

 एक तुटताच नवे उभे शिर 

ऐसा कारभार वासनेचा 

तेच जगी ताट तेच जगी पोट 

येईना रे वीट जीवनाचा 

इंद्रिय कौतुके किती ही लाळावी

भजनी वाळावी वृत्ती किती

आगा दत्तात्रेया येऊनिया भान 

जाते विसरून पुन्हा पुन्हा 

दगडाची रेघ मार मनावर 

नाम तयावर कोर तुझे

विक्रांता करी गा चिरा पायरीचा

खांब वा दारीचा तुझ्या प्रभू

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

धिंडोरा

धिंडोरा

******

तुझिया कीर्तीचा पिटतो धिंडोरा   

दत्त दिगंबरा पानोपानी ॥

पाहिल्यावाचून  वर्णीतो रूपाला

गातसे कीर्तीला जागोजागी ॥

तुझिया कृपेचा देतो भरवसा 

पल्लवीत आशा करूनिया ॥

भरल्यावाचून माझी रिती झोळी 

करतो दिवाळी साजिरी मी ॥

मागे बहुतांची फळली रे भक्ती 

तया दत्त प्रीती फळा आली ॥

त्याच कथा गोड जीवी ठसवितो 

दास म्हणवतो आशेने मी ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

दत्त पहावा

दत्त 

****

दत्त भजावा मनात दत्त पहावा जनात 

दत्त धरावा उरात 

सर्वकाळ 

दत्त जाणावा सुरात दत्त ऐकावा स्वरात 

दत्त वाचावा पदात  

अनुपम्य 

दत्त पूजावा मूर्तीत दत्त भजावा कीर्तित 

दत्त स्मरावा प्रीतीत 

सदोदित 

दत्त प्रेमाचा पुतळा दत्त लावण्याची कळा 

दत्त शांतीचाच मळा 

मुमुक्षास

दत्त गातागाता मन गेले प्रेमाने भरून 

दत्त कविता होवून 

आले असे 

दत्त मायबाप माझे दत्तकृपा छत्र माझे

दत्त जीवीचे प्रीतीचे 

आत्मभान 

ऐसे जाणूनिया दत्त झाला उगा हा विक्रांत 

बसे एकटक दत्त  

न्याहाळत 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

जगण्याच्या वाटा

जगण्याच्या वाटा 

*************

जगण्याच्या माझ्या वाटा 

दत्ता याव्या तुझ्या पथा 

वाहिलेला भार आता 

उतरावा तुझे हाता 

काय काय पोतडीत 

आलो मी रे साठवित

ज्ञान अहंकार मोठा 

देह जन्म वर्ण ताठा

मोडूनिया पाठ गेली 

पाऊले ही भार झाली 

तुझ्याकडे ती येणारी  

चाल आता मंद झाली

आता नको मोकलूस 

दूर दूर ढकलुस 

देई आता दृढ भाव

दावी चैतन्याचा गाव

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

कृपेची घागर

कृपेची घागर

***

कृपेची घागर ओत डोक्यावर 

जावा मनोमळ वाहूनिया  ॥१

घेई रे कृपाळा तुझा तू करून 

शुचित्व देऊन दगडा या  ॥२

जगत हे व्यर्थ मनी समजलो

तव पदी आलो दत्तात्रेया ॥ ३

चुकला विचार बाटला आचार 

करी रे स्वीकार प्रक्षाळून ॥  ४

माय तू स्नेहाळ प्रेमाची केवळ 

चुकल्या सांभाळ लेकरा या ॥५

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

बंध

बंध

***

मी नच कुणाचा जरी जाणतो रे 

तरी वाहतो रे बंध उरी    ॥

मित्र सखे प्रिय जपे नाती गोती 

जमे सभोवती गर्दी बहु ॥

वाहतो कर्मात उणा व्यवहारी 

जाणे पाने सारी शिशिराची ॥

कुणा उगा सोडू कुणा बळे धरू 

कुणा प्रीती करू सारे तुची ॥

तूच दिले दत्ता सारे प्रियजन 

अन वैरावीण ठेवियले ॥

ठेवियले तैसा राहीन मी दत्ता 

सदोदित चित्ता  परी रहा 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

करुणा

करुणा

*******

 करुणा दत्ताची वचने प्रेमाची 

रत्ने शब्दांची मनी येती ॥

दत्तकृपेचा हा भरा ये सागर 

लाटा लाटा वर उसळती ॥

तोच लिहविता कर्ता करविता 

चालवे विक्रांता सर्वकाळ ॥

लिहिता लिहिता सुखाचा लहरी 

उठे मनावरी पुन्हा पुन्हा ॥

कधीतरी पण देवा शब्दाविण 

हृदयी येऊन भेटी द्या हो ॥

कळल्यावाचून मागतो मागणे 

तुज जे करणे तेच कर ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

सार्थ करी दत्ता

सार्थ करी दत्ता

************

विश्वाचे कारण तुच दयाघन 

आहे मी जाणून दत्तात्रेया 

परी तव कारणे केवळ जगणे

मीपण सरणे घडेचिना 

अशी माया ओढी मज जगजेठी 

अवघी तोकडी शक्ती पडे 

अगा अवघड संसार दुस्तर 

सांगे वारंवार  जगत हे

परी तुझी माया असे तुझी छाया 

तिला सारावया  कृपा तुझी

देवाच्या भक्तांची लाज देवालागी 

येऊनिया वेगी तारी आता

विक्रांत जीवनी वाहे अहेतूक 

येऊन कौतुक दावी देवा 

सार्थ करी दत्ता तुझे देवपण 

मजला देऊन आलिंगन

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

हट्ट

हट्ट 

***

हाच हट्ट माझा  पुरा करी देवा 

यावे भक्तीभावा फळ माझ्या 

जाणतो कोरडा तूप तेलाविन 

आलो मी घेऊन नैवेद्य हा 

फुले बाजाराची कुठल्या काळाची 

बोटे व्यापाराची लागलेली 

धूप गंधाकडे नच लक्ष काही 

डोळ्यानी मी पाही तुज फक्त

तुजला स्मरता प्रेमात रंगता 

जाहलो चुकता उपचार 

नको अन्य काही मज तुजविण

हृदयी येऊन रहा फक्त

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

सर

सर

****

कधी ओघळेल प्रभू प्रेम सर 

मनी झरझर तृषार्थ या  ॥

कधी ओलावेल मृतिका चित्तीची 

रुजेल भक्तीची बी बियाणे ॥

कधी विरूढेल ज्ञानाची पालवी 

भक्तीत लाघवी नटलेली ॥

कधी हे फळेल आत्मज्ञान उरी 

कृतार्थ कुसरी सजेल मी ॥

कधी मी पाहीन तुझे प्रेम सुख 

सुखराशी हाक ऐक माझी ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

नृसिंहसरस्वतीस्वामी महाराज स्मरण

श्री. नृसिंहसरस्वती स्वामी महाराज स्मरण

(गुरुप्रतिपदा)

भक्त कल्पद्रुमा नरसिंह देवा 

आनंदाचा ठेवा भक्तास तू ॥१

इह परलोकी करुनी संतुष्ट 

सांभाळशी भक्त आले जे ते ॥२

कुणी पीडा झाले ऋणी अडकले

आपदी पडले संसाराच्या ॥३

देऊनी आधार सकाम भक्तीचा

चरित्र ग्रंथाचा  सांभाळले ॥४

कोणी मोक्षास्तव जाहले व्याकुळ 

पहाया प्रेमळ गुरुमुर्ती ॥५

तया तूच देवा दावलीस वाट 

दिले हृदयात स्थान स्थिर ॥६

सदैव निर्मळ भक्तीला विकला 

अंकित जाहला  निज भक्ता ॥७

विक्रांत तुझिया दारीचा सेवक 

निश्चित निशंक सर्वकाळ ॥८

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

कृपा सिंधू

कृपा सिंधू

*******

काय मी कुठला दिसेल का तुला 

जीव हा  क्षीणला दत्तात्रेया

रोगी भोगी सदा वृती अडकला 

चित्ती हरवला मोहामध्ये

किती पुण्य राशी केल्यासी पावन 

हृदयी देऊन स्थान त्यांना 

किती हीनदीन करुणा करून 

घेतले ठेवून चरणाशी 

थोडा मजसाठी होई गा उदार 

करी भव पार अज्ञाचा या 

विक्रांत मनीचे  पुरव गा आर्त  

स्वामी तू समर्थ कृपा सिंधू

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

कहाणी

कहाणी

*****

दत्त सुखाचे ठेवणे दत्त मुखाचे मागणे 

दत्त जीवाचे जगणे सर्वकाळ ॥

दत्त आयुष्य वेचने दत्त भोगते भोगणे 

दत्त सारे ओलांडणे जमविले ॥

 दत्त प्रेमात वाहने दत्त सुखात निजणे 

दत्त विरही रडणे घडे  नित्य ॥

दत्त नामाचा गजर दत्त कीर्तीचा जागर

दत्त प्रीतीचा पाझर फुटो मनी ॥

दत्त उदो लय स्थिती दत्त अवघी समष्टी 

दत्ता वाचून जगती अन्य नाही ॥

घडो दत्तमय जीणे सरो उगा भटकणे 

दत्त स्मरणे कारणे जन्म जावो ॥

दत्ता विक्रांत कहानी तवपदी हरवूनी 

जावो कृतार्थ होऊनी इये वेळी ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

स्वामीभेट

स्वामी भेटी

********

कृपेचे कोवळे चांदणे पडले 

स्वामी भेटी आले 

अकस्मात

 नसे घरदार नसे ध्यानीमनी 

भाग्य उठावणी 

केली काही 

तोच स्वामीराय तोच ज्ञानदेव 

आला अनुभव 

अंतरात 

शशी चंद्र नावे जरी आन आन 

कैवल्याचे दान 

तोच एक 

विक्रांत भिजला चिंब अंतरात 

न्हाईला सुखात 

वरदायी

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

देई बा दत्ता

देई बा दत्ता 

*****

प्रेम ना सुटावे कधीच मनीचे 

ध्यान ना मिटावे कधीच उरीचे

पद मिळो मज कधी सन्मानाचे

घोट कधी कडू वा अपमानाचे

कश्याकशात या गुंतल्या वाचून 

स्मरण असावे तुझिया रूपाचे

जे काही असेल माझिया भल्याचे

तुझ्या पथावर दृढ चालण्याचे

देई बा दत्ता केवळ तेवढे 

सुटू दे जगाचे पाश हे फुकाचे

मागतो विक्रांत सारखे मागणे 

तुजला दयाळा कौतुक प्रेमाचे 

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

कळेना

कळेना

*******

कळेना मजला स्वीकार नकार 

तरी दारावर उभा आहे ॥

कळेना मजला आवडनिवड 

तरी धडपड रिझवाया ॥

कळेना मजला काही देणे घेणे 

तरीही धरणे धरीतसे ॥

कळेना मजला प्रीतीत जगणे 

तरी आळवणे करीतसे ॥

आता प्रियोत्तमा येऊ दे करुणा 

करतो याचना कळण्याची ॥

देई प्रेम खुणा काही अंतरात 

धाडा ना परत मागणी ही ॥

पाहतो विक्रांत नाम गुणातीत 

सर्वव्यापी दत्त भक्तीभावे ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ .

तो भेटतो

तो भेटतो

*******

तो न भेटतो जपाने 

तो न भेटतो तपाने

तो भेटतो केवळ रे 

फक्त त्याच्याच कृपेने ॥१

तो न भेटतो पूजेने 

तो न भेटतो गायने 

तो भेटतो केवळ रे 

फक्त त्याच्याच कृपेने ॥२

तो न भेटतो बलाने 

तो न भेटतो धनाने 

तो भेटतो केवळ रे 

फक्त त्याच्याच कृपेने ॥३

तरी सारी कवाईत 

भाग आहे रे करणे 

अनुसंधानाचे दोर 

हाती धरून ठेवणे ॥४

हाती आहे नांगरणे 

बीज पेरून ठेवणे

आणि राखण करणे 

नाही पाऊस पडणे ॥५

तो भेटतो सदा तयाला 

हवा आहे तो जयाला 

पण त्या ही भेटण्याला 

नियम नाही कुठला ॥६

तो भेटतो याच क्षणी 

किंवा नच युगोयुगी 

परी निराशे वाचूनी 

ठेव प्रतिक्षा तू जागी ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

हरवला दत्त

हरवला दत्त

***

हरवला दत्त इथल्या गर्दीत

निघाला शोधीत निवाऱ्याला ॥१

पावलोपावली लागतात ठेचा 

पथ माणसांचा हरवला ॥२

घुसमटे श्वास सोनियाच्या धुरी

क्रूर वाटमारी जागो जागी ॥३

कोटी प्रार्थनाचा चाले गलबला 

स्वर थकलेला हर एक ॥४

तारावे कुणाला मारावे कुणाला

हात थबकला करुणेने ॥५

जगून मरणे मरून सुटणे 

घट्ट तरी जिणे लोंबकळे ॥६

कर्म दरिद्रयाची रेषा या शहरा ?

काय देवा झाला निरुपाय .? ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

मागणे

मागणे

****

घडू दे शेवट आता प्रवासाचा 

दिस अखेरचा गोड करी ॥१

नाही बुद्धिमान नाही धनवान 

जगलो लहान सामान्यसा ॥२

नाही कीर्तीवंत नाही यशोवंत 

परी अंगणात तुझ्या झालो ॥३

पावलो ती सुखे लागती जीवना 

भोगले दुःखांना सवे काही ॥४

जैसी जन चार जगती जीवनी 

भिन्न रे त्याहूनी नच नाही ॥५

उतलो मातलो नाहीच वाहणी

अवघी करणी देवा तुझी ॥६

देवा सुखरूप आणले जगात 

नेई रे परत तैसाची तू ॥७

परी नेण्याआधी एकच विनंती 

देवा देई भेटी  एक वेळ ॥८

पाहता पाहता तुझिया रूपाला 

मिटू दे हा डोळा अखेरचा ll९

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

कृपा कल्लोळ

कृपा कल्लोळ 

*******

काय माझी गती अन् काय मती 

तुज दयानिधी भेटू शके

काय माझी श्रद्धा काय ते साधन 

तुज बोलावून घेऊ शके 

अवघा देहाचा भटक्या मनाचा 

वाहिला जगाचा भार मनी 

संसारी राबलो प्रपंची गुंतलो 

जरी दारी आलो देवा तुझ्या 

जाणतो मी न्यून माझे हे अपार 

कृपेचा सागर परी तू रे

घडते घडणे अवघे तुझ्याने 

म्हणून मागणे मनी ये रे 

कृपेचा कल्लोळी भिजव मजला 

प्रवास उरला पूर्ण करी

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️