कवितेसाठी कविता: अवधूत

अवधूत लेबल असलेली पोस्ट दाखवित आहे. सर्व पोस्ट्‍स दर्शवा

सोमवार, २२ सप्टेंबर, २०२५

*********

घडव जगणे माझे दत्तराया

रोग भोग माया हरवून ॥

तुझिया पायीचा करी रे सेवक

भक्तीचे कौतुक दावुनिया ॥

यावी क्षणोक्षणी तुझी आठवण

तयाविन मन हलू नये ॥

झिजो माझी काया तुझ्या भक्तीसाठी

नको आटाआटी व्यवहारी ॥

ठेवील तू तैसा राहीन मी दत्ता

नुरो देई गाथा भिन्नत्वाची ॥

जळणे विझणे नसे दीपा हाती

पाजळणे ज्योती पेटविल्या ॥

तैसे कर्म घडो तुवा ठरविले

शून्य असलेले माझेपण ॥

🌾🌾🌾

https://kavitesathikavita.blogspot.com

☘☘☘☘ 🕉️ .

*****

कुणा कधी भेटूनिया

मुखी घास भरवतो

ओळखी वाचून कुणा

गूढ गुज हाती देतो ॥

माझ्यासाठी अवधूता

काय पाय थकतात

दोन घास देण्यासाठी

हात मागे सरतात ॥

असेलही कुरूप मी

मातीमध्ये मळलेला

मनाचिया चिखलात

कधी कुठे पडलेला ॥

तुझ्याविना पण कोण

मजलागी पुसणार

धुवूनिया भक्ती प्रेमे

जवळी रे करणार ॥

माय बाप सखा तूच

अन्य कोणी ना आधार

दीनबंधू दीनानाथ

ब्रीद करी रे साकार ॥

🌾🌾🌾

https://kavitesathikavita.blogspot.com .

☘☘☘☘ 🕉️