जाणे
*****
तुझे आकाशाचे नाते तुज कळत का नाही
तुझे धरित्रीचे मूळ
तुज दिसत का नाही ॥
नादी लागून वाऱ्याच्या
भरकटतो सारखा
जग घालून जन्माला
का रे त्यात तू परका ॥
लाख सवंगडी तरी
जन्म विराण एकटा
हात सोडवून दूर
नेती प्रवाहाच्या वाटा ॥
जन्मा आधीचा एकांत
गुज सांगतो कानात
झाले खेळणे बहुत
येणे परत घरात ॥
रंग अवधूत तोच
वाट पाहतो शून्यात
गजबजाट जगाचा
आता हरपो वाऱ्यात ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️
अप्रतिम
उत्तर द्याहटवा