कवितेसाठी कविता: कृपेची होय बरसात

शनिवार, ६ फेब्रुवारी, २०१६

तुझिया कृपेची होय बरसात

अपार श्रीमंत झालो आज ||१||

काय कुठे ठेवू कळेना मनाला

जीव भारावला हरखून ||२ ||

खरे खोटे काय चिमटा घेवून

घेई आकळून जागेपण ||३||

मोकळे जाहले आज मी पण

उरले कारण धारणेला ||४ ||

मागितल्याविन उगवला क्षण

आनंद दाटून आसमंत ||५ ||

नव्हते आसन त्रिकुटीत मन

खुले नभांगण छतावरी ||६ ||

तरीही तोच मी जाणीव तरल

व्यापुनी केवळ उरलेलो||७ ||

कोण तो विक्रांत कुठे हरवला

असुनी नसला देखियेला ||८||

विक्रांत प्रभाकर तिकोणे

कवितेसाठी कविता