निरार्थ वाद | उथळ संवाद
शब्दात मद | साचलेला ||
मिळाली दैवाने | थोरली भाकरी |
परी शिरजोरी | डोईजड ||
माजले हे तण | वाढे बेगुमान |
मनात रोवून | बीज साऱ्या ||
लायकी वाचून | नाचती सोंगाडे |
तया पाया पडे | मिंधेराजे ||
तुझे माझे बळ | शेवटी केवळ |
पुष्ट वळवळ | गांडूळाची ||
पांढरी कॉलर | घाबरे मळाला ||
ऐकुनी नावाला | थोर थोर ||
अहाहा चालला | काय हा खेळ |
बाजार केवळ | खिसे भरू ||
झाकले डोळे | घातला गॉगल |
विक्रांता पडळ | नयनाला ||
विक्रांत
प्रभाकर तिकोणे
कोणत्याही टिप्पण्या नाहीत:
टिप्पणी पोस्ट करा