मुद्रा
*****
माझ्या अस्तित्वावर उमटलेली तुझी मुद्रा अगदी खोलवर
मला पुसता येत नाही
ती मुद्रा म्हणजे तू नाहीस
हे तर अधिकच जीवघेणे
तरीही ते स्वप्न मी पुसत नाही
आसक्ततीचा डंख करून जीवाला
तू गेलीस दूरवर हसत हसत
आणि मला त्या दाहावर
औषधही सापडत नाही
मी बोलावूनही तू येणार नाहीस
माहित आहे मला पक्केपणी
पण हे प्राणपणाने बोलावणे
माझ्याकडून थांबत नाही
तू आता दूर अज्ञात कुठेतरी
आयुष्याने बांधलेल्या
चिरेबंद चौकटीची
पण मनाला तुझ्याविना रिक्त
अजूनही होता येत नाही
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com .
☘☘☘☘ 🕉️
कोणत्याही टिप्पण्‍या नाहीत:
टिप्पणी पोस्ट करा