सत्ता
*****
तयांच्या मनात इवलेसे स्वप्न इवल्या स्वप्नात दिसे सिंहासन ॥
इवलीशी गादी सुटता सुटेना
सत्तेची तहान भागता भागेना ॥
काय कोणा हाती असते रे सत्ता
अवघ्याचा दाता देव देता घेता ॥
पाहुनी लाथाळी हसू फुटे चित्ता
कसा खेळविसी तू रे इथे दत्ता ॥
हौस पुरविशी तूच देवराया
कर्मगुणे तया देऊनिया खाया ॥
तरी न भरते कुणाचेच पोट
एकावर एक ताटावर ताट ॥
अंतरी वळली तीच वाट बरी
चालणे निवांत घेऊनिया झोळी ॥
राजा नच व्हावे कधी रे वेड्यांचा
भिकारी बरा तो नर्मदा तीरीचा ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com .
☘☘☘☘ 🕉️
कोणत्याही टिप्पण्‍या नाहीत:
टिप्पणी पोस्ट करा