जीवन व जरा
***********
जीवना पथाला चालून म्हाताराथकला बसला घडीभर
पाहतो जगाला पाहतो मनाला
घट्ट चिकटला घरादारा
म्हाताऱ्याला जरी आता मोह नाही
धन लोभ काही उरलेला
परी माझे पण तया टाकवेना
मुठ ती सुटेना काही केल्या
थकल्या देहात तेच असे मन
सुखाचे चांदणं वेचणारे
शाप वृद्धत्वाचा असा जीवनाला
कधी कुणी दिला कळेनाच
पान पिकूनिया हवे का गळाया
वाट ती पहाया झडण्याची
तया पडण्याची भय चिंता नाही
पिकणे तरीही पटेचि ना
नसे तो ययाती नसे वा गजनी
जातांना संपूनी लोभ तृष्णा
परंतु जरा ही नसावी जीवना
शाप अर्था विना वाटे जणू
हळूच विझावा दिवा पेटलेला
प्रकाश जगाला वाटतांना
नको तडफड नको तगमग
नको भगभग देह मना
डाव अखेरचा ऐसा हा घडावा
चंद्रास्त भिडावा पहाटेला
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️ .
