कृपेचा
******
राखला हा देह माझा दत्तात्रेये हरवली त्राये एक एक ॥१
अन्यथा असता कधीच सुटला
फुगा हा फुटला कुण्या क्षणी ॥२
कितीदा आपदी मज रक्षीयले
मरणा धाडीले माघारी ते ॥३
कितीदा आणले पुन्हा घरी दारी
सुटू वाटेवरी जाता जाता ॥४
भरण्या खळगी भुके दोन वेळा
पोटार्थी विद्येला पाठविला ॥५
आणि वर बळे दिला मानपान
कृपाळ सघन ओघळला ॥६
लायकी वाचून निशाण पै केले
चिरगुट नेले आभाळाला ॥७
किती किती वाणू दत्ता तुझे ऋण
तुज ओळगेन जिवेभावे ॥८
विक्रांत भाग्याचा जाहला दत्ताचा
आणिक कृपेचा घर केला ॥९
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘
कोणत्याही टिप्पण्‍या नाहीत:
टिप्पणी पोस्ट करा