कवितेसाठी कविता: हृदयी साठवत

गुरुवार, २२ जून, २०२३

*******

काय सांगू तुज त्याच त्याच व्यथा

स्वामी गुरुदत्ता अवधूता ॥१

देही जन्मा येता चालणे हा रस्ता

वाटसरा चिंता ठरलेल्या ॥२

कधी मिळे उन कधी ती सावली

चालणे पाउली पुढे पुढे ॥३

दुःख वाळवंट सुख हिरवळ

भोगणे अटळ हे तो रे ॥४

सारे तुझे देणे सारे तुझे घेणे

मग ते मोजणे कशासाठी ॥५

देशील रे तू ते भोगणे सुखाने

मुखी गात गाणे तुझे सदा ॥६

विक्रांत जीवनी चाले दिनरात

तुज हृदयात साठवत ॥७

🌾🌾🌾

https://kavitesathikavita.blogspot.com

☘☘☘☘*