कवितेसाठी कविता: गिरनार जग

रविवार, ४ जून, २०२३

*********

असे वेगळे रे जग ते वेगळे

परी पाहिजे रे तेथ तू चालले ॥

पळू पळू वर प्रेमे येई जरा

वळू वळू मागे पायरी उतारा ॥

डोळ्यात मुर्त धरा पादुकांना

क्षण भेट ठेवा खोचूनिया मना ॥

दुखतील पाय होय गैरसोय

घेई मजा तीही नको रे उपाय ॥

जर कोणी साथ दत्तभक्त भला

काय वर्णू मग तया त्या भाग्याला ॥

भाव द्विगुणित मग एक एरा

होय बोलणारा तोही ऐकणारा |

भेटेल दत्त रे भेटेल खचित

धरू नको शंका मनात किंचित ॥

कळेल ते रूप नच वा कळेल

आशिष खुण ती हृदी उतरेल ॥

होईल परीक्षा तिथे तुझी काही

झालास तर हो सुखे नापासही ॥

परी लिहिणारा तोही एक शेरा

घडे संग त्याचा क्षण एक जरा ॥

हे रे काय कमी असे या जीवाला

दत्त जडलेला राहो जगण्याला ॥

🌾🌾🌾

https://kavitesathikavita.blogspot.com

☘☘☘☘☘