अंतहिन
*******
कुळशीळ मात जातसे वाहत निबीड वनात जगण्याच्या ॥
पाठीवरी ओझे जुनाट कथांचे
फाटक्या व्यथांचे गळुनिया ॥
धरलेली हाती शून्याचीच काठी
पथ आपटती नसलेला ॥
सरूनिया जाते पाठ केले गाणे
मना ऐकवणे मन किती ॥
सुन्न यांत्रिकशी पाऊले चालती
नसून माझी ती मानतो मी ॥
वाटेत भेटती वाटवधे किती
मारून टाकती हकनाक ॥
मरूनिया जातो मरणाचा ध्यास
चालतो प्रवास अंतहीन ॥
उगाच टोचती काटेकुटे वेडे
काय कधी मढे रडतसे ॥
विक्रांत शोधतो थडगे बापुडे
नसलेली हाडे पेरायला ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘
कोणत्याही टिप्पण्या नाहीत:
टिप्पणी पोस्ट करा