तो भेटतो
*******
तो न भेटतो जपाने तो न भेटतो तपाने
तो भेटतो केवळ रे
फक्त त्याच्याच कृपेने ॥१
तो न भेटतो पूजेने
तो न भेटतो गायने
तो भेटतो केवळ रे
फक्त त्याच्याच कृपेने ॥२
तो न भेटतो बलाने
तो न भेटतो धनाने
तो भेटतो केवळ रे
फक्त त्याच्याच कृपेने ॥३
तरी सारी कवाईत
भाग आहे रे करणे
अनुसंधानाचे दोर
हाती धरून ठेवणे ॥४
हाती आहे नांगरणे
बीज पेरून ठेवणे
आणि राखण करणे
नाही पाऊस पडणे ॥५
तो भेटतो सदा तयाला
हवा आहे तो जयाला
पण त्या ही भेटण्याला
नियम नाही कुठला ॥६
तो भेटतो याच क्षणी
किंवा नच युगोयुगी
परी निराशे वाचूनी
ठेव प्रतिक्षा तू जागी ॥७
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ 🕉️
