आभासी दुनिया

.आभासी दुनिया

*********

रात्र सरत होती बॅटरी जळत होती 

मोबाईलवर तिची हसरी छबी होती ॥

ठाऊक ना किती काळ उलटून गेला

जीवघेणा एकांत मनात रुतून बसला ॥

पिवळी लाईन बॅटरीची लाल होत गेली 

वार्निंग देऊन बत्ती क्षणात  विझून गेली ॥

चार्जर शोधणे अन लावणे निरर्थक होते 

स्मृतीच्या त्या आगीत मलाच जळणे होते ॥

कुणास ठाऊक किती वेळ पुढे सरकला

समजले ना मज होतो क्षणात गोठलेला ॥

थंडगार फरशीवरती होते हिव दाटलेले

हळू हळू रक्तात खोलवर झिरपत गेले ॥

सुन्न स्पर्श झाले सारे शून्य झाल्या संवेदना 

आभासी दुनिया कळली मजला आभासाविना ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ .