तुझा स्वर

तुझा स्वर

*******

पुन्हा पुन्हा कानात मी 

साठवते तुझा स्वर 

भाळते त्या वेळूवर 

वेळू वेड्या ओठावर ॥

पुन्हा पुन्हा ऐकूनही 

अतृप्तीच मनावर 

अविरत झरो गमे 

अमृताची ती धार ॥

काय तुला ठाव असे 

किती बोल ते मधुर 

अनभिज्ञ चंद्र जणू 

चांदणे किती टिपूर ॥

उंचावून मान वर 

जसा नाचतो चकोर 

तशी काही गत माझी 

होते श्रुती अनावर ॥

अन तुझे मौन जेव्हा 

घनावते दुरावून 

शोधते मी पडसाद

त्या स्मृतीच्या दरीतून ॥

तेव्हाही तेच गुंजन 

होते कणाकणातून

 तू तुझ्या वेळूसकट 

जात आहे मी होऊन ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ ,🕉️