कवितेसाठी कविता: कळो तुज आता तरी

शुक्रवार, २३ सप्टेंबर, २०१६

तसा तर जन्म पुढे

काही वेळ वाहणार
कधीतरी देह मग
काळ असे गिळणार

आला गेला पळ असा

सांग कधी पाहणार
शून्य योजनांचा व्यास
मन कधी मोजणार

भोवताली सांगणारे
सुज्ञ आंधळे हजार
पाय कुठे ठेवायचे
त्यांना कसे कळणार

सोड वेड्या हट्ट खुळा

कोण कुणा पुरणार

फुटे घट पाण्यातला

मागे काय उरणार

कळो तुज आता तरी

शुध्द जाणीव अपार

अन मग गळो तुझा

तूच नसलेला भार

डॉ.विक्रांत प्रभाकर तिकोणे

http://kavitesathikavita.blogspot.in/

कवितेसाठी कविता