डॉ . पाष्टे सर
************
बीएमसी का चालते ?
राज्य सरकार का काम करते ?
सीएमएस ऑफिस का चमकते ?
याचे उत्तर एकच आहे
ते म्हणजे पाष्टेसारखी माणसं आहेत म्हणून
खरंच पाष्टे सर अशा माणसातीलही दुर्मिळ माणूस आहे .
त्याचे असणे इतरांसाठी वरदान अन आधार आहे
बहुतेक माणसं केवळ स्वतःच्या विचार करून जगतात
पण स्वतःबरोबरच इतरांचेही भले व्हावे
असे वाटणे आणि त्यासाठी झटणे .
ही माणसातील मानव्याची खूण आहे
डॉ. पाष्टेची काम करण्याची पद्धत तशीच आहे .
आपण काम करत असलेली संस्था
रुग्णालय आपले सहकारी कर्मचारी
आणि सेवा घेणारे रुग्ण
या सगळ्याबद्दल प्रेम असलेला,
अपार अनुकंपा असलेला
आणि त्यापोटी प्रचंड काम करणारा
हा भला माणूस आहे.
ते कामही उगाचच वरवरचे नाही
दिवस भरणे नाही तर
त्या कामात जीव ओतणे ते काम सुंदर करणे
हे त्याचे स्वरूप आहे
हा खराखुरा कर्मयोग आहे
आणि हा कर्मयोग साधने त्याना जमले आहे.
त्यासाठी त्याना वेगळा प्रयत्न करावा लागला नाही
तर ते त्यांचा अंगभूत स्वभाव आहे
खरंच हे रसायनच विलक्षण आहे
त्याला मेडिसिन खूप चांगले येते
कॉम्प्युटर तर उत्तमच येतो
तो उत्तम सांख्यिकी आहे
तो बोलण्यात पटाईत आहे .
कुठलेही उत्तर ड्राफ्ट प्रपोजल तारांकित प्रश्न
क्षणार्धात तयार करू शकणारा
हा भाषा प्रभू आहे .
प्रशासकीय शब्दावर आणि भाषेवर
त्याची हुकूमत वादातीत आहे
प्रश्नाचा आवाका उत्तराचा विस्तार
त्यातील नेमकी आकडेवारी
त्याचे गणित पाष्टे च्या डोक्यात
प्रश्न बघताच होत असते
याशिवाय प्रचंड विनम्रता अंगीभुत असलेला,
तरीही वेळप्रसंगी रागवणारा पण
तो राग पोटात न ठेवणारा
हा सहदयी माणूस आहे
त्याला कामचुकारपणा करणारे लोक
आवडत नाहीत
त्याच्याबरोबर त्याचे पटत नाही
त्याना वाटते सगळ्यांनी त्याच्यासारखे
झडझडून कामाला लागावे
तसे होत नसते
सारेच प्रमोद पष्टे नसतात ना !
मग थोडे वितुष्ट येते
पण साहेबांना त्याची पर्वा नसते
सूर्याने प्रकाशलेच पाहिजे
तार्यांनी चमकलेच पाहिजे
प्रत्येकाने आपले कर्तव्य केलेच पाहिजे
हे त्यांचें ठाम मत आहे
ते त्यांनी स्वतः अंगी बाणलेले तत्व आहे
बीएमसीची कार्यपद्धती
अन त्या कार्यपद्धतीच्या मर्यादा
त्यात अंगभूत असलेली कठोरता
बेपर्वाई ढिलाई आणि उद्दामता
याचे संपूर्ण भान असूनही
त्यावर मात करण्याचे सर्व प्रयत्न त्यांनी केले
आणि अनेकदा अश्या प्रयत्नात
अनेक प्रकल्पात त्यांनी खूप यशही मिळवले
कातळ फुटेल तेव्हा फुटेल पण
घाव मारणे सोडणे नाही
हे त्यांचे एक महत्त्वाचे सूत्र होते
पाष्टे खूपच चांगला मित्र आहे
खूपच चांगला सहकारी आहे
पण तो खूप चांगला पती
आणि पिताही आहे
हे त्यांच्या घरच्याशी होणाऱ्या संभाषणातून
त्यांच्या काही उद्गारातून
आणि धावपळीतून
सहजच लक्षात येत होते .
एकाच वेळी एवढी सारे चांगले गुण
एका माणसात कसे असू शकतात
असा प्रश्न अनेकांना पडतो
त्याबाबतीत पाष्टे सर भाग्यवंत आहेत
मला मात्र त्यांच्या अनेक गुणापैकी
एक गुण सगळ्यात आवडतो
तो म्हणजे त्यांचा वैयक्तिक जीवनातील
अन कामातील स्वच्छता सुरेखता
टापटीपणा आटोपशीरपणा
त्यांचे कामातील नियोजन आलेखन
याची साक्ष देतात .
त्याशिवाय त्यांची आपल्या कामावरती
असलेली निष्ठा
आपल्या वरिष्ठा बद्दल असलेला आदर
हा वादातीत आहे
सी एम एस पदा वरील डॉ.मलिक मॅडम पासून
डॉ.ठाकूर मॅडम पर्यंतच्या सर्व सीएमएसला
पाष्टे सरांनी काम करतांना पाहिले
आणि प्रत्येकाला आपल्या निष्ठेचा प्रत्यय दिला .
त्या खुर्चीचा त्यांनी कधीही अनादर केला नाही
किंवा त्याला कमीपणा येईल
अशी कुठलीही कृती केली नाही
ते पद अधिकाधिक शक्तिशाली व महत्त्वाचे कसे होईल
याची जमीन काळजी वाहिली .
माझ्या मते सीएमएस हे प्रेसिडेंट तर
पाष्टे सर सीएमएस ऑफीसचे पंतप्रधान होते . .
वर मुक्तछंदात केलेला गुणांचा सारांश असा
करता येईल की
हा माणूस अपार गुणांचा
असे दिलदार मनाचा ॥
हा माणूस अनंत ध्यासाचा
वसा याचा कामाचा ॥
हा माणूस खंबीर निष्ठेचा
झरा पोटी चांगुलीकीचा "
हा माणूस प्रगाढ मैत्रीचा
जीव जीवाला द्यावयाचा ॥
हा माणूस मधाळ गोडीचा
पाणी भरल्या शहाळ्याचा ॥
हा माणूस अवघा प्रेमाचा
हृदयी सदैव ठेवायचा ॥
हा माणूस आईचा साईचा
दत्तप्रभूच्या कृपेचा ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘ .
