मोरया

मोरया

*****

तुझ्या कृपेची सावली 

मज मिळाली मोरया

पदापदावरी शांती 

मज वरे देवराया

काम विघ्नांचे रे इथे 

सदा संकटे आणणे

दीना गांजणे छळणे 

सैरावैरा पळवणे

होता दास तुझा देवा 

गेले दुःख ते पळून

झाले जगणे चांदणे 

गेलो सुखाने भरून 

अगा जगी तम नाही 

ऐसे कधी झाले नाही 

तुझे अधिष्ठान होता 

दिव्य दिशा झाल्या दाही 

मिळो मायेची पाखर 

अन्य काही नको देवा 

सदा रहा तू जीवनी 

नित्य घडू दे रे सेवा

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ 🕉️ 

॥श्री गणपती ॥

॥श्री गणपती ॥

🌺🌺🌺🌺

मुलाधारी मूळ कामनांचे कुळ 

साचलेले स्थुळ देहरूपी ॥१

दूर त्या सारावे निर्मळ मी व्हावे 

म्हणूनही करावे साधन रे ॥२

तेथील दैवत असे एकदंत 

ऊर्जेच्या दारात आधिष्टीले ॥३

शरण जाऊन करावे प्रसन्न

अनन्य होऊन भक्ती भावे ॥४

मग चिदाकाशी रंग होतो लाल 

भक्तीचा गुलाल उसळून ॥५

हृदी ओंकाराची वाजू लागे धून 

साक्षीचे अंगण  उजळून ॥६

उघडे कवाड देव गजानन

कृपा जागवून मध्यमेत ॥७

विक्रांत प्रेमाची करी विनवणी 

सखया येवूनी भेटी देई ॥८

🌾🌾🌾

© डॉ.विक्रांत प्रभाकर तिकोणे 

 kavitesathikavita. 

☘☘☘☘ 🕉️ 

प्रथमेश

प्रथमेश

******

निर्गुणी उदेला देव प्रथमेश 

रुप हे विशेष घेऊनिया ॥ १

पंचतत्व मेळा जाहला रे गोळा 

जणू आले खेळा शून्यातून ॥ २

उमटला शब्द निर्वाती प्रणव 

जाहला प्रसव जगताचा ॥ ३

रूप रस गंध ठाकले सकळ

जाहवे सफळ जन्मा येणे ॥४

महासुखा आले दोंद आनंदाचे 

नाव ते नाहीचे उमटेना ॥५

पाहुनिया मूर्त कल्पना अतित 

विक्रांत चकित वेडावला ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ ,🕉️

ॐ कार तू

  ॐ कार तू

********

निराकारी उमटला संपूर्ण स्वयंभू आकार तू         

मिती आली जन्माला विश्वसंकल्प साकार तू

महास्फोटा आधीची अनाकलनीय उर्जा तू 

नेणिवेचा अथांग सागर जाणीवेचा गर्भ तू 

ज्ञानाची सीमा पुसली चक्रावणारा अनंत तू  

विज्ञानाची घुसळण इवली सर्वदा अस्पर्श तू 

थकली बुद्धी ठकला विचार अगणित अपार तू 

माझ्या मनी सजविलेला ज्ञानेशाचा ॐ कार तू

डॉ.विक्रांत प्रभाकर तिकोणे

https://kavitesathikavita.blogspot.com/

आरती

आरती

******

खणाणती टाळ सुर ठरलेले 

शब्द रुळलेले ओठी जरी ॥१

परि भाव नवे मनी क्षणोक्षणी 

चाले ओवाळणी आरतीची ॥२

तीच ती प्रार्थना सुखाची याचना 

मागताना मना लाज नाही ॥३

हे तो असे एक आनंदाचे गाणे 

जीवना भेटणे जीवनाने ॥४

देव भक्ता पडे देहाविन मिठी 

रेशमाच्या गाठी अंतरात ॥५

विक्रांत पेटली ज्योत अंतरात 

रोम रोमी दाट तेज फाके ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ .

गणेश रूप

 रूप

****

पाहता सुंदर रूप मनोहर

हर्ष अनिवार मनी दाटे ॥

लोभस साजरी मूर्ती गणेशाची 

बटू बालकाची कांतीमान ॥

शुभ्र मोत्यासम असे एकदंत 

कृपा वक्रतुंड मुखावरी ॥

निळसर शेला पीत पितांबर 

लेणी देहावर सुवर्णाची ॥

कटीसी मेखला हातात कंकण 

पायात पैंजण रुणझुण ॥

योगिया दुर्लभ भक्तासी सुलभ 

प्रेमाचे वालभ मुर्त असे ॥

रूप पाहूनिया हरपले भान 

मन झाले लीन पायी तया ॥

विक्रांत हृदयी नित्य विनायक 

पाहतो कौतुक भक्तीचे हे ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ .

आला गणपती

आला गणपती

************

आला गणपती आला गुणपती 

आला महामती विद्येचा तो ॥१

आला मिरवत वाद्य गजरात 

बसे मखरात सजलेल्या ॥२

झाली रोषणाई चढली झिलई 

अवघीच घाई घरी दारी ॥३

भरले बाजार पेढे फळे हार 

चालला व्यापार धामधुम ॥४

जमा झाले गावी अवघे ते भाई

भेटीगाठी जीवी जिवापाड ॥५

सज्ज सुगरणी सज्ज सुहासिनी 

पहा कौतुकानी रूप ल्याले ॥६

होतेसे गजर टाळांचा अपार 

गुलाल भुवर विखुरला ॥७

रांगोळ्याची नक्षी मिरवती दारे 

फटाके भूर्नळे हर्ष फुटे ॥ ८

गल्ली  बोळामध्ये मांडले मांडव

विराजित देव थोर तिथे ॥९

अन तयाचा तो वेगळाच थाट 

आरास अफाट मांडलेली ॥१०

 अनंत मूर्तीत एकच तो देव 

डोळीयात भाव प्रेममय ॥११

आता दहा दिस चालू दे दंगल

 नभात मंगल तेज कोंडो ॥१२

विक्रांत आनंद मनात दाटला 

विश्वात भरला ओसंडून ॥१३

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ .

देव भुरळ

देव भुरळ

*****

कैसी ही भुरळ पडे या मनाला 

देव गणेशाला पाहतांना ॥

पदोपदी माया जाणवते त्याची 

सावली सुखाची अंगावरी ॥

रेखीव आकार प्रकट ॐकार 

सुख डोळ्यावर पांघरते ॥

प्रेम वर्षावात करावे कौतुक .

पायी वा मस्तक ठेवावे त्या ॥

कळेनासे होते चाकाटून मन 

गहीवर दाटून येतो उरी ॥

होते वेडी कुडी दुर्वांची ती जुडी

पडे मौन घडी अंतरात ॥

देतोस जगता काय अन किती 

तयाची गणती नाही कुठे ॥

विक्रांत मागतो तुझ्या पायी सेवा 

हृदयात देवा सदा रहा ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  

☘☘☘☘ .

विघ्न विनाशक

विघ्नविनाशक

***********

सांगितल्याविन येतात संकट 

नाना ती बिकट  मनुष्याला ॥१

केल्याविना पाप मागे लागे लाव 

जाऊ वाटे जीव भयानेच ॥२

निळीयाचा हार होतो समजत 

विखार तो होत डसू लागे ॥३

अशावेळी देव विघ्नविनाशक 

स्मरे गणनायक आर्त होत ॥४

मग तो कृपाळ करितो सांभाळ 

देऊनिया बळ सात्विकसे ॥५

विक्रांत अवघी सरे खळबळ

होतसे नितळ शांत मन ॥६

पुण्याईचा झेंडा फडके नभात 

वीज येवो वात प्रारब्धात ॥७

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘

गणेश जन्म रहस्य

गणेश जन्म रहस्य.

डॉ. विक्रांत तिकोणे

**************

श्री गणपतीचा जन्म श्री भगवती पार्वती मातेच्या अंगावरील मळापासून झाला आहे, असे पुराणा मध्ये लिहिले आहे .असे ऐकवून कुणी म्हणतात, की एवढा मळ मातेच्या अंगावर होता की काय ? आणि एक प्रकारची  टर  उडवली जाते  या गोष्टीला हसले जाते. तसेच भगवान शंकरांना सर्व ज्ञानी जगतपित्याला हा आपला पुत्र  आहे किंवा तो पार्वतीपासून झालेला मानसपुत्र समोर आहे हे  पण  कसे कळत नाही याबाबतही दुसरी शंका घेतले जाते. तिसरी शंका म्हणजे इतक्या लहान मुलाचा निर्दयपणे वध करणारा परमेश्वर भगवान कसा असू शकेल ? असे विचारले जाते. ज्या वेळेला भगवान शंकराकडून  गणपतीला हत्तीचे डोके आणून लावले जाते त्या वेळी हत्तीच्या डोक्याची आणि मनुष्याच्या देहाची तुलना करूनही तिथे पुन्हा हसले जाते 

आणि अशाप्रकारे वरवर योग्य वाटणारे पण आत खच्चीकरण करणारे प्रश्न करून या देशातील हिंदू तरुणांचा बालकांचा बुद्धिभेद केला जातो आणि श्रद्धेला हात घातला जातो .

तर अश्या ज्या गोष्टी आहेत . हे जे तथाकथित विज्ञानावादी लोक आहेत, त्यांना हे कळत नाही (किंवा मुद्दाम नकळल्याचा आव आणून) की पुराण कथा या एक प्रकारच्या  रूपक कथा असतात. त्याचे बाह्य स्वरूप वेगळे असते आणि अंतरंग वेगळे असते.

 लक्षात घ्या की भगवान श्री शंकर आणि माता पार्वती यांचे संबंध हे प्रथम गुरु आणि प्रथम शिष्य असे आहे.आणि मळ म्हणजे अज्ञानाचे प्रतीक आहे .  भगवती माता ही आपल्या अंगावरच्या मळापासून म्हणजे स्वतःमध्ये असलेल्या  अज्ञान मळा पासून या पुत्राची निर्मिती करत आहे (आपल्या मनात प्रसवणारे विचार हे आपले पुत्रच तर असतात) म्हणजे काय तर हा अंधार अज्ञान रुपी जो पुत्र आहे जो मातेने तयार केलाय तो तिच्या न्युनामुळे  निर्माण झालेला आहे आणि हा अज्ञानरूपी पुत्र तिने आपल्या दारात ठेवलेला आहे आणि ज्या वेळेला भगवान शिव तिच्या घरात प्रवेश करू पाहतात म्हणजे अंतकरणात येऊ पाहतात मनात प्रवेश करू पाहतात त्यावेळेला हा अज्ञान रुपी मुलगा  त्यांना आत येवू देत  नाही .त्यावेळेला तो दयाळू परम कल्याणकारी महादेव त्या अज्ञानाचा वध करतो, त्याला नष्ट करतो जेणेकरून आपली परम शिष्य भगवती माता पार्वती आपल्यापर्यंत पोहोचू शकेल किंवा तो तिच्यापर्यंत पोहोचू शकेल ,अशी योजना ते करतात परंतु मातेचा अज्ञान जरी गेला असला परमेश्वर भेटला असला तरी मोह अजूनही गेलेला नाही, ती मोहवश आहे म्हणून तिला त्या अज्ञानातही सुख वाटत होते, आनंद होत होता. त्यासाठी तिने पुन्हा त्या अज्ञानाचा हट्ट धरला आहे अशा वेळेला तो ज्ञानी अन कणवाळू भक्त वत्सल महादेव या अज्ञानाचे रूपांतर ज्ञानामध्ये करत आहेत त्या अज्ञानापासून तयार झालेल्या पुत्राला ज्ञानामय करत आहे आणि हत्ती हे आपल्या संस्कृतीमध्ये ज्ञानाचे प्रतीक मानले गेले आहे .म्हणुनच गणपती हा बुद्धीचे प्रतीक आहे. तो सार विचार करून विवेकाने निर्णय घेतो त्याच्या त्या निर्णयाने कार्यात येणारे विघ्न आपोआप नष्ट होते . तो विघ्नांतक आहे. तो म्हणूनच सुखकर्ता आणि दुःखहर्ता आह. हे त्याचे खरे स्वरूप आहे असे मला वाटते .

अन हा या कथेतील गूढ अर्थ आहे.

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘ ..

(गणपती) साथ

साथ

************

देव गणपती माझा 

मज सांभाळतो किती 

माझ्या जीवन प्रवासी 

चाले धरूनिया हाती ॥

दार उघडण्या जाता 

देव डावीकडे असे 

रूप धुम्राचे सावळे 

मला आभाळची भासे ॥

दार उघडता देव 

उभा सामोरी असतो 

प्रभा तेजाची रूपाची 

मज पावन करतो ॥

डोई फेटा भरजरी 

दृष्टी प्रेमळ रोखली 

चल जा मी साथ आहे 

शब्द गुंजती अंतरी ॥

घर सोडता सोडता 

येतो गेटच्या जवळ 

सिद्धी विनायक होतं 

देई निरोप प्रेमळ ॥

तोच आरूढ वाहनी 

रथ माझा रे सावरी 

पथ निष्कंटक करी 

जणू आणे कामावरी ॥

आत जाता ऑफिसात 

असतो टेबलावरी 

काम प्रामाणिक माझे 

देई साक्षीची स्वाक्षरी ॥

कर्म हाती बघ तुझ्या 

मज सांगे गणपती 

मनी पेरतो सुबुद्धी 

वाट दाखवत खोटी ॥

त्याचा म्हणवितो गण 

कर्म पेलतो कळती 

फळ देता तया पायी 

सुख मिळते विक्रांती ॥

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘ .

गणपती

गणपती

*******

आवडी ध्याईला गणपती 

मनी मी पाहिला गणपती ॥धृ॥

जयासी वर्णिले ऋषींनी 

जयाला वंदिले सुरांनी 

हृदी मी धरीला गणपती ॥१॥

कृपाळू भक्त रक्षणाला 

विघ्न सेना ताडण्याला 

सदैव धावला गणपती ॥२॥

किती हा आतुर देण्याला

घेऊनी रिद्धी सिद्धीला 

मजसी भावला गणपती ॥३

देव हा सगुणी ओंकार 

व्यापुनी राहे चराचर 

कृपेने जाणला गणपती ॥४

घेतसे ओढून  जवळी 

त्याची भक्त मांदियाळी 

कुडी ही वाहिली गणपती ॥५

जाहला कृतार्थ विक्रांत

आला तया अंगणात 

भरून राहीला गणपती॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘

माझा गणपती महासुखराशी

महासुखराशी

**********

महासुखराशी माझा गणपती

लावण्याची मूर्ती मनोहर ॥१

पाहताच तया हृदयात प्रीती 

ओसंडून येती काठोकाठ॥२

जैसे आकाशात बिंब उगवते 

सृष्टी प्रकाशाते हर्ष भरे॥३

तया परि मन होते उल्हसित 

दंग चैतन्यात अनामिक॥४

तांबूस शेंदरी तनु ती गोजरी

तुंदील साजरी सान गोड॥५

पाश अंकुशादी आयुध हातात 

भग्न एक दात तोही शोभे॥६

वस्त्र भरजरी सर्प कटीवरी

शुर्पकर्णावरी कुंडल ती॥७

दिव्य पितांबर शेला खांद्यावर 

माळा गळाभर सुगंधित ॥८

पाहूनया मूर्ती सुखोर्मी उठती 

डोळे पाझरती आनंदाने ॥९

भाग्यवशे देसी तूच तुझी भक्ती

रुजली विक्रांती कृपा तुझी ॥१०

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘..

श्रीपाद गणेश

श्रीपाद गणेश
**********

आकाश प्रकाश
माझा देव गणेश
श्रीपाद वल्लभ
घेऊनिया वेष ॥
येई भादव्यात
चतुर्थीला थेट
मंगल सुखाची
करी लयलूट ॥
काय काय मागू
माझ्या दैवताला
जय लाभ तर
असती नखाला ॥
धन मान रूप
नको बाबा मला
सदा राहू दे रे
तुझिया पदाला ॥
बघू दे रूपाला
स्तवू दे गुणाला
ओठ करू देत
नाम गर्जनेला ॥
याहून अधिक
नच उरो चित्ता
म्हण रे तू बाप्पा
तुझा या विक्रांता ॥

(c) डॉ.विक्रांत प्रभाकर तिकोणे
https://kavitesathikavita.blogspot.in‍