वेदना
*****
मस्तकात कळ नेणाऱ्या
फाटलेल्या स्नायूंच्या
आकुंचनाने होणाऱ्या
तुटलेल्या स्वप्नांच्या
काचा रुतून घडणार्या
वेदना दिसतात काही
चेहऱ्यावर पसरतांना
तर काही जाणवतात
आतल्या आत साहतांना
शाप असतात वेदना
काही उ:शाप असतात
वास्तवात जीवनाच्या
परत आणून सोडतात
टाळून लाख वेदना
टाळता येत नाही
सोसून बहूत वेदना
शहाणपणा येत नाही
जन्म मरण दुःख
विरह विघटन
अपघात आजारपण
या सार्यांची
प्रचंड फौज घेऊन
येतेच जीवन भेटायला
अगदी प्रत्येकाला
आणि एक संधी देते
वेदनांचे गाणे करायला
कदाचित
हेच एक प्रयोजन असावे
वेदनांचे
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘☘ .
कोणत्याही टिप्पण्या नाहीत:
टिप्पणी पोस्ट करा