देवापुढे नसो
कधी दानपेटी
रित ही ओखटी
वाटे मज ॥
असतो का कधी
देवाचा तो धाक
म्हणे पैसा टाक
कधी का तो ॥
असो धर्म पेटी
स्थळ चालविण्या
सोय ही करण्या
येणा-याची ॥
परंतु तयात
गोवू नये देवा
ऑफरिंग नावा
ठेवूनिया ॥
बाह्य मार्गावरी
पेटी ती ठेवावी
पावती फाडावी
हवी तर ॥
नको त्या धनिका
व्हीआयपी सेवा
जणू काही देवा
लाडका तो ॥
सुटो वहिवाट
ऐसी जनरीत
एकाच रांगेत
सारे राहू ॥
विक्रांता दिसतो
पैशांचा बाजार
जणू तो संसार
इथे दुजा ॥
डॉ.विक्रांत
प्रभाकर तिकोणे
http://kavitesathikavita.blogspot.in
००००००
कोणत्याही टिप्पण्‍या नाहीत:
टिप्पणी पोस्ट करा