त्या रक्ताचे मुल्य मागते
*********************
त्या रक्ताचे मुल्य मागते
आता इथली माती रे
मना मनात आग पेटली
विद्ध प्रत्येक छाती रे
तडफडणारे क्षुब्ध मानस
चरफडणारे श्वास असे रे
करण्या तर्पन त्या रक्ताने
हाताला या आस असे रे
शिशुपाला अपराध तुझे
शंभर आता भरले रे
ये क्षण उडविण्या शिर
चक्र आता आतुरले रे
क्षुद्र घातकी सर्पदंश हे
किती एक ते साहिले रे
चिरडण्यास डोके त्याचे
पाय आता उगारले रे
दया न आता व्याळाला
मैत्री शब्द ही मेला रे
सूड हवा फक्त सूड तो
रक्ताभिषिंचित माला रे
वाट पहाते टकमक टोक
फितुराला भिरकावण्या रे
देशद्रोही जे आग लावती
इथल्या नंदनवनाला रे
शांतीचा हा देश ठरवला
तो शुभ्र कपडा फेकला रे
शांती नांदते त्याच घराला
जो बळी मुठी आवळला रे
©डॉ.विक्रांत प्रभाकर तिकोणे
कोणत्याही टिप्पण्‍या नाहीत:
टिप्पणी पोस्ट करा