सोमवार, १० जुलै, २०२३

अंतहीन

अंतहिन
*******
कुळशीळ मात जातसे वाहत 
निबीड वनात जगण्याच्या ॥
पाठीवरी ओझे जुनाट कथांचे 
फाटक्या व्यथांचे गळुनिया ॥
धरलेली हाती शून्याचीच काठी 
पथ आपटती नसलेला ॥
सरूनिया जाते पाठ केले गाणे 
मना ऐकवणे मन किती ॥
सुन्न यांत्रिकशी पाऊले चालती 
नसून माझी ती मानतो मी  ॥
वाटेत भेटती वाटवधे किती 
मारून टाकती हकनाक ॥
मरूनिया जातो मरणाचा ध्यास 
चालतो प्रवास अंतहीन ॥
उगाच टोचती काटेकुटे वेडे 
काय कधी मढे रडतसे ॥
विक्रांत शोधतो थडगे बापुडे 
नसलेली हाडे पेरायला ॥

🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘
येथे कोणत्याही टिप्पण्‍या नाहीत:
लेबल:

रविवार, ९ जुलै, २०२३

प्रेम

प्रेम
****
जमाखर्च करतात आडाखे बांधतात 
अरे ते काय प्रेम करतात ?
बँक बॅलन्स जाणतात घरदार पाहतात 
अरे ते काय प्रेम करतात ?
रूपावरती भाळतात जगासाठी मिरवतात 
अरे ते काय प्रेम करतात ?
धर्मासाठी फसवतात आमिष गळा लावतात 
अरे ते काय प्रेम करतात ?
प्रेमासाठी मारतात किंवा मरून जातात 
त्याला काय प्रेम म्हणतात ?

तू केलेस ठीक आहे तिने न केले ठीक आहे 
तेही प्रेम रंग असतात !
गरजांनी भेटतात तडजोडीत जगतात 
ते प्रेमाचे रंग लावतात !
दिव्यासारखे पेट घेते अन केवळ जळत राहते 
ते पेटणे प्रेम असते !
तेल सारे सरून जाते वातही जळून जाते 
ते जळणे प्रेम असते !
असे प्रेम दुर्मिळ असते क्वचित कुणास भेटते 
त्याचे जगणे गाणे होते
🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘
येथे कोणत्याही टिप्पण्‍या नाहीत:
लेबल:

शुक्रवार, ७ जुलै, २०२३

वर्षा .

वर्षा
*****
तू आलीस तेव्हा माझे हात रिते होते 
सारे वाटून झाले होते 
काही घेणे उरले नव्हते 
खरंतर मिळवायचे किंवा हरवायचे 
सारेच हिशोब मिटून गेले होते 
पण तू आलीस तेव्हा का न कळे 
माझे हात पुन्हा जुळले 
भरून जावेसे ओंजळीला वाटले 
तू ओंजळीत मावणार नव्हतीस 
तू ओंजळीत राहणार नव्हतीस 
फटीतून अलगत गळून जाणार होतीस 
तरीही पसरले मी हात 
तुला स्पर्श करायला तुला भेटायला 
ती ओल एक विलक्षण ओलावा 
देऊन गेली जीवनाला 
तू जशी आलीस तशी गेलीस 
अन् मी  पाहिले तेव्हा 
पालवी फुटली होती माझ्या हाताला

🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘

येथे कोणत्याही टिप्पण्‍या नाहीत:
लेबल:

जगण्याला कारण


कारण
*******

असं नाही कि जगायला 
काही कारण लागतं 
कारणा वाचूनही जगता येत 

आव्हान देत जीवन
समोर ठाकलेलं असतं 
आणि माघारी कधीच जायचं नसतं 
हे आमच्यात कुठेतरी रुजलेलं असतं 
जणू कोणीतरी लिहून ठेवलेलं असतं

आणि दुसरं असं की 
जगण्याच्या पलीकडे काय आहे 
हे आम्हालाच काय 
कुणालाही माहीत नसतं

आणि हे उगाचच किंवा
आपोआपच हाती आलेल 
विलक्षण अस्तित्व
आणि अस्तित्वा भोवती 
जमलेली सहअस्तित्व 
त्यात निर्माण झालेलं नातं 
सहजीवनाच जाळ एक भाव विश्व
हे सार नाही सोडवत 
कुणालाही 
 
नाही सोडवत
फळातील किड्याला
मांसातील अळीला
रानातील मोराला 
म्हाताऱ्या सिंहाला
तर मग माणसाला 
कसं शक्य आहे 

खरतर हे सार सुटतं
सोडून जायचं असतं 
हे जरी माणसाला  दिसतं 
माहित असतं तरीही

हे अस्तित्व नेमकं कुणाचं असतं 
देहाचं असतं की मनाच असतं 
विचारांच असतं की विकारांचं असतं 
बुद्धीचं असतं की भावनांचं असतं 
लौकिक असतं की पारलौकिक असतं 

उपनिषदात गीतेत कुराणात बायबलात 
धम्म पदात घेतलेले शोध हा तर 
शोधाचा इतिहास असतो 
त्याचा  जगण्याशी संबंध नसतो 

आपण फक्त असतो अस्तित्व 
अस्तित्वाचा शोध घेत
अस्तित्वात जगत आणि जळत
किंवा अस्तित्वाचा प्रश्नच टाळत

म्हणूनच म्हणतो तसंही जगता येतं 
जगण्याला कारण लागतच असं नाही

🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘
येथे कोणत्याही टिप्पण्‍या नाहीत:

गुरुवार, ६ जुलै, २०२३

You respect I respect

Respect
*********
I call it Ram 
you call it Allah 
he calls it Jesus 
She calls it else 
so what 
let it be 
but don't  insist me 
to call it Allah 
or Jesus or else
Beacuse I know 
as it is, as it is 
it has no name 
it has no from as such 
but let me imagine it 
Yes I love it 
let me attached with it 
emotionally physically 
because I like it 
you are not taught it 
you are not conditioned
to do so 
don't do it 
as it's not in you 
You do what are you doing 
You don't have to follow 
my rituals 
I respect you 
you respect me
but if you disrespect me 
don't expect 
Any respect from me .

🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘
येथे कोणत्याही टिप्पण्‍या नाहीत:
लेबल:

बुधवार, ५ जुलै, २०२३

पाहतो दत्त

दत्त पाहतो 
********"
दत्त पाहतो मी माझिया मनात 
स्वप्नाच्या जगात हरवला १

भोगी कदा योगी वाहतो वाहणी 
जीवनाची गाणी गात उगा २

एकांत शिखरी किचाट बाजारी 
हरवली स्वारी ठायी ठायी ३

रंगलेला कधी भजनाच्या मस्ती 
भोजनात वस्ती किंवा केला ४

सौंदर्य लोलुप विरक्त कोरडा 
घनदाट रिता जागेवरी ५

आजची उद्याची नसलेली चिंता
जगताची व्यथा घेत माथा ६

पाहणारा दत्त जगणारा दत्त 
अगोचर दत्त सर्वव्यापी ७

भावनेत दत्त भावतीत दत्त  
वाचून विक्रांत असलेला  ८

🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘


 


येथे कोणत्याही टिप्पण्‍या नाहीत:
लेबल:

मंगळवार, ४ जुलै, २०२३

दरबारी


दरबारी
*******
मी दरबारात गेलो 
फॉर्मल ड्रेस घालून 
राजा .वैतागला 
आणि म्हणाला 
दरबारी वस्त्र 
घालून ये रे ! 

मग मी 
दरबारी वस्त्र घातले 
मिरवत गेलो 
राजा म्हणाला 
एवढे टाईट नको 
जरा सैल घाल 
आणि  जरा लांब ही

मी न कुरकुरता
होय म्हंटले
घालतो  म्हंटले
अन् तसेच लांब रुंद
वस्त्र घातले

राजा म्हणाला 
अरे एवढे लांब 
ते कशाला ?
थोडेआखूड 
घालून येई बरे !

मी आखूड
घालून गेलो 
तो म्हणाला 
काय कळतच नाही 
तुम्हा लोकांना 
बरं असू दे .

आणि मग मला 
परवानगी मिळाली 
दरबाराची .
कपडे काढून 
नाचायची .

🌾🌾🌾
© डॉ.विक्रांत प्रभाकर तिकोणे 
https://kavitesathikavita.blogspot.com  
☘☘☘☘
येथे कोणत्याही टिप्पण्‍या नाहीत:
लेबल:
याची सदस्यत्व घ्या: टिप्पण्या (Atom)

झाड

झाड **** या किनाऱ्याला  मी चालत आहे  मी माझ्यातच रुजत आहे  मी झाड होत आहे  इथले पाणी खोलवर  माझ्या आत झिरपत आहे  तोच मी जरी  काह...

  • तुझे डोळे
    तुझे डोळे ***** तुझे डोळे चांदण्यांचे बावरल्या हरीणीचे दूर कुठे अडकल्या गायीच्या गं दावणीचे . तुझे डोळे नवाईचे घनदाट...
  • मरण
    झाकलिया घटीचा दिवा । नेणिजे काय झाला केधवा । यारीती जो पांडवा । देह ठेवी ...ज्ञानेश्वरी मरण ***** असे हवे रे सुंदर मरण   ज्यात ओघळून  जाईल ज...
  • अशोक कोकणे श्रद्धांजली
    अशोक कोकणे श्रद्धांजली  *********** महाड मधील आमचे घरमालक कोकणे, भाई अन् ताई यांना असलेली पाच मुले, विजय दिलीप अशोक प्रदीप आणि र...
  • अधिक देखणे तरी निरंजन पाहणे भावार्थ
    अधिक देखणे तरी निरंजन पाहणे  भावार्थ ******************************** अधिक देखणे तरी निरंजन पाहणे योगीराज विनविणे मना आले वो माय...
  • झाड
    झाड **** या किनाऱ्याला  मी चालत आहे  मी माझ्यातच रुजत आहे  मी झाड होत आहे  इथले पाणी खोलवर  माझ्या आत झिरपत आहे  तोच मी जरी  काह...
  • महात्मा ज्योतिबा फुले
    महात्मा ज्योतिबा  फुले ****** ज्योतीबा, तू लावलेल्या वटवृक्षांच्या सावलीत जगत आहोत आम्ही समतेची स्वातंत्र्याची फळे चाखत आहोत आम्ह...
  • पळस
    पळस ***** भर उन्हाळ्यात  रणरणत्या उन्हात  जात असता  उजाड  रानावनातून अचानक  त्या तपकिरी सुकलेल्या  हिरवट पिवळट झाडीमध्ये  दिसतो ...
  • दत्त याचना
    जाहलो पतित हरवून वाट दिवसाच रात चालतांना || डोळ्याला पडळ दिसतच नाही धावाधाव काही कामा नये || देवून हाकारे होय ...
  • दु:खाने चिंब भिजलेली ...
    दु:खाने चिंब भिजलेली कविता वाचतांना   दु:खाने कदमदलेले जीवन ओढत चालतांना किती आधार वाटतो मला त्या शब्दांचा शब्द सा...
  • देव देश अन धर्मासाठी
    देव देश अन धर्मासाठी  ********** जन्म देवासाठी  जावो हा सगळा  भावभक्ती मळा  फुलो सदा ॥ देह देशासाठी  जावो हा सगळा  ...