खोटा पैसा
********
खोटा पैसा देवाला हळूच वाहून टाकला
चालवण्याचा सगळा
मग व्याप तो गेला
पुण्याच्या खात्यात
तो बहुदा जमा झाला
नाही झाला तर त्यात
तोटा तो रे कुठला
मीही एक खोटा पैसा
दानपेटीत पडलेला
संसारात व्यापारात
सदा बाद झालेला
या दानातून त्या दानात
उगाच पडत आलेला
ज्याने त्याने लवकरी
सुटका करून घेतलेला
कधी दत्ताच्या थाळीत
कधी देवीच्या आरतीत
कधी भिकारी ओंजळीत
कधी नदीच्या प्रवाहात
कुठे कुठे वाहिलेला
छापा काटा पुसलेला
खरा असो वा असो खोटा
धातूचा तो तुकडा असतो
कुणीतरी कुठे पाडला
धर्म तोच निभावत असतो
असून मूल्य नाही म्हणून
सदा फेकला जात असतो.
कोणत्याही टिप्पण्‍या नाहीत:
टिप्पणी पोस्ट करा