कवितेसाठी कविता: तुझे घर

गुरुवार, २३ मार्च, २०२३

*******

दूर तुझे घर बंद दरवाजा

आणि मज सजा प्रतिक्षेची ॥१

नको बोलावूस हरकत नाही

मज घर नाही असे नाही ॥२

मोडके छप्पर तुटलेल्या भिंती

कुणी नाही साथी सोबतीला ॥३

तर काय झाले जीवन सरले

आयुष्य मिटले असे नाही ॥४

इथे धरेवर जगतात जीव

मरतात जीव असंख्यात ॥५

एक मी तयात जगतो सुखात

अर्थ जगण्यात जरी नाही ॥६

आसक्ती देहाची आसक्ती मनाची

आसक्ती जीवाची जरी मना॥ ७

प्रत्येक फुलाचे कुठे फळ होते

बीज ते रुजते जन्मावया ॥८

तुझे घर तुला माझे घर मला

असे जगण्याला सादर मी ॥९

🌾🌾🌾