ll नर्मदा ll

रेवा तीरावर l संपावे जीवन

पापाचे क्षालन l व्हावे सा-या ll १ ll

नर्मदा हरच्या l घोषात चालून

दयावी उडवून l भवचिंता ll २ ll

तप:पूत मन l तप:पूत तन

अवघे होवून l जावे तेथे ll ३ ll

माईच्या प्रेमाने l भिजुनिया चिंब

पात्रातील थेंब l तिच्या व्हावे ll ४ ll

सोडुनिया भिती l काळजी उद्याची

जगावी रोजची  l सुख दु:ख ll ५ ll

तीरावर उभे l संतांचे आशीष
तयाने जीवास l मार्ग लाभ ll ६ ll

कितीदा ऐकली l माईची ती माया  

जीव तिच्या पाया l जडलासे ll ७ ll

साद घालतसे l युगे युगे वाहे

चल लवलाहे l आता तिथे ll ८ ll

जावे परीक्रमे l तिये दर्शनासी

उतावळी ऐसी l होय मना ll ९ ll

विक्रांत प्रभाकर

http://kavitesathikavita.blogspot.in/