नर्मदा हाक

नर्मदा हाक

माझ्या मनात

गिरनार साद

माझ्या हृदयात

थकला देह

देहास वाहून

थकले मन

मनास ओढून

तोच विसावा

विश्व व्यापला

चैतन्य स्पर्श

हवा जीवाला

अधीर मन

देह उताविळ

पदी शृंखला

परी जडशीळ

अन प्रार्थना

येई उसवून

अस्तित्वाच्या

कणाकणातून

विक्रांत प्रभाकर

http://kavitesathikavita.blogspot.in/

दत्त कुळी

देव घेई रूपे  | भक्तांच्या कारणे |

भक्तीसी तो उणे | येवू न दे ||१||

साई गजानन | समर्थ शंकर |

कौतुक अपार | भक्तांसाठी ||२||

श्रीपाद वल्लभ | नरसिंह स्वामी |

चरित्र वाचून | जन्म तरे ||३||

माणिक प्रभू श्री | वासुदेवानंद |

भरला आनंद | दत्त कुळी ||४||

पुण्यासी फळलो | तया दारी आलो |

सकल पातलो | भक्ती प्रेम  ||५||

विक्रांत प्रभाकर

http://kavitesathikavita.blogspot.in/

तुटलेला उंबरठा

जडावले पाय पुन्हा 
घराकडे वळतांना 
तुटलेला उंबरठा 
अडखळे पावूलांना 

तीच गाथा तीच व्यथा 
तेच शब्द जळलेले 
तेच मिष तेच विष 
तेच रक्त करपले  

कसा आणि किती वेळ 
खेळ असा चालणार 
एक एक दिस भार 
घाव वृक्ष साहणार 

अंतहीन गोष्ट जणू 
वेताळाची जन्मभर 
मर मर  रोज मर 
मनातल्या चितेवर 

विक्रांत प्रभाकर

http://kavitesathikavita.blogspot.in/

दत्त पायधूळ

लाथाडते  कुणी | लावे कुणी माथी |
मातीची हि गती | कळे कुणा ||
लोहाचीही  माती | देहाचीही माती |
पंच महाभूती | बांधलेली || 
ऐशा या मातीचा | करुनिया गोळा |
अहंते फुंकला | कैसा कुणी  ॥   
मातीचा महाल | नभी पसरला |
आरशी लिंपला | देखणा पै ||
परी काळवशे | पुनरपी माती  |
जन्म मृत्यू किती | भोगतसे  |
विप्राची या माती | का न कळे कशी 
झाली पुण्यराशी | सुकृताने ||
दत्त पायतळी | प्रेमे अंथरली |
पायधूळ झाली | कृपा त्यांची || 

विक्रांत प्रभाकर
http://kavitesathikavita.blogspot.in/