कवितेसाठी कविता: ज्ञानदेवी

रविवार, ३० जून, २०२४

*******

शब्दा शब्दातून ओघळते कृपा

ज्ञानदेव रूपा कान पाही ॥१

कैवल्याचे शब्द शब्दची कैवल्य

होतो मनोलय ऐकतांना ॥२

उरते स्पंदन एकतारी मन

सुखे कणकण आंदोलीत ॥३

शब्दांचे लावण्य अद्भुत अपार

ज्ञाना अंतपार लागतो ना ॥४

किती किती वाणू ग्रंथ ज्ञानदेवी

अनावर होई वाचा माझी ॥५

मराठी होऊन जो न ग्रंथ वाचे

फाटक्या भाग्याचे दरिद्री ते ॥६

विक्रांता भेटला ग्रंथ महामेरू

कृपेचा सागरू ज्ञानदेव ॥७

🌾🌾🌾

https://kavitesathikavita.blogspot.com .

☘☘☘☘ 🕉️

कवितेसाठी कविता