व्याख्या

व्याख्या

*******

सुखासाठी जेव्हा तिला 

त्याची ती गरज नसते 

मजेसाठी आणि त्याला 

तिची ती फिकीर नसते 

तेव्हा व्याख्या सुखाची 

पुर्ण पणे बदलते

सूरशब्दा विना गाणे 

जन्माआधी हरवते

जीवन तेव्हा लोकलची

तुडुंबशी गर्दी होते 

कणवत अस्तित्वाची 

स्थिती शून्यवत जाते

सभोवती शब्द स्पर्श 

लक्ष लक्ष स्पंदन असते 

तरी त्यांचे एकटेपण 

लाखांमध्ये एक असते 

तुझ्याविना असणार 

तुझ्याविना जग होते 

त्यात काही नवे नसे 

नियमात जग चालते

पण मिटतांना वातीचे 

आकाश प्रकाश होते

कृतार्थता  प्रगटते ती

दिव्यास हवी असते 

नाते तेलवातीचे पण 

जेव्हा कधी मरून जाते

भगभगतो जाळ अन

जग धूराने भरून जाते

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com  .

☘☘☘☘ 🕉️