झाड
****
फांदीफांदी वठलेली पानंपानं सुकलेली कलथून खोड जुणं अर्धी मुळे उन्मळली
तरी झाड पडेना माती काही सुटेना ॥१
जरी आभाळ जमेना सावली काही धरेना
जीर्ण शीर्ण फांदीवर वेडा पक्षीही बसेना
तरी झाड रडेना आस काही सरेना ॥२
स्वप्नाची ती साद नाही मेघाची ही साथ नाही
आणि पहाटे भुवर दव ते उतरत नाही
तरी झाड हालेना हट्ट आपुला सोडेना ॥३
तापलेला कणकण मरणारा क्षणक्षण
सर्वदूर भितिजा पर्यंत फक्त एक मरण
तरीही झाड मोडेना पांढरे निशाण लावेना ॥४
प्रेम मरत नसते आस तुटत नसते
आषाढाचे स्वप्न उरी सदा झुलत असते
म्हणून झाड मरेना वेल मनीची सुकेना ॥ ५
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com .
☘☘☘☘ 🕉️ .
कोणत्याही टिप्पण्‍या नाहीत:
टिप्पणी पोस्ट करा