रिक्तता
*******
घेरून आहे जीवनाला
मी वाहतो आहे
क्षणभंगुर माझेपण
जलपृष्ठावर अनंताच्या !
क्षणाक्षणाने अनंत बनते ?
की क्षणातच अनंत असते ?
किंवा क्षण अन अनंत
असे काहीच नसते ?
असणे फक्त असणे असते ?
अन नसणे ही
असण्यातच अंतर्भूत असते ?
उसन्या उत्तरांच्या
असंख्य लहरी
हेलकावत आहेत
अस्तित्व
कुठल्यातरी लहरीवर
आरूढ झाले तरीही
अन साऱ्या लहरींना
नाकारले तरीही
अस्तित्वात
काहीच फरक पडत नाही
तर मग हा
निखळ उत्तराचा हव्यास
का व्यापून राहतो
अस्तित्वाला?
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘☘.
कोणत्याही टिप्पण्या नाहीत:
टिप्पणी पोस्ट करा