*******
देवे भेटविले
कित्येक साधूंना
लाविले चरण
धरावया ॥
कधी इच्छेविना
इच्छे वा धरून
जाऊन नमन
करविले ॥
खरे तर सारे
तयाच्या आधीन
एक कृपा क्षण
त्यांचा पुरे ।
आधी होता हट्ट
कशाला ते जावे
दत्ता तूच द्यावे
देणे जे ते ॥
जर का नसेल
द्यावयाचे तुला
पडून पायाला
राहू दे ना ॥
दत्त माझा सारा
जाळी अभिमान
त्यांचे थोरपण
दावुनिया ॥
तयांचे हातून
स्वतःच येऊन
ऊर्जेचे स्फुरण
प्रेमे देत ॥
सारे गुरुतत्व
असे दत्त रूप
अरूपाचे रूप
घेऊनिया ॥
विक्रांत दत्ताचा
अवघ्या संतांचा
दास हा जन्माचा
लीन झाला ॥
🌾🌾🌾
© डॉ.विक्रांत प्रभाकर तिकोणे
https://kavitesathikavita.blogspot.com
☘☘☘☘☘☘
कोणत्याही टिप्पण्‍या नाहीत:
टिप्पणी पोस्ट करा