माझ्या ओवळ्या मनात
एक देव्हारा चंदनी
फुले तगर कण्हेरी
गंध स्वर्गीय सुमनी
माझा रिकामा देव्हारा
सोहं दुमदुमे ध्वनी
दिवा जळतो सतत
कुणी पहिल्या वाचुनी
तिथे शब्दांचा पसारा
पूजा बसते रुसुनी
भाव उमटतो नवा
साऱ्या शब्दांस सारुनी
तिथे तटस्थ जाणीव
साऱ्या जगा विसरुनी
गीत प्राणात ओसंडे
माझे अवघे सांडूनी
पाहे विक्रांत देवास
देव कुठेही नसूनी
पाहू म्हणता म्हणता
गेले पाहणे वाहुनी
डॉ.विक्रांत प्रभाकर तिकोणे
http://kavitesathikavita.blogspot.in/
कोणत्याही टिप्पण्या नाहीत:
टिप्पणी पोस्ट करा