दत्त दावितो

दत्त दावितो

*********

दत्त दावितो जगणे 

मज करून खेळणे 

डाव उलटा सुलटा 

त्यात हसणे रडणे ॥१

कधी फुगवी हवेने 

उंच नेई रे वाऱ्याने 

मग फजित करुन

हवा काढतो सुईने ॥२

कधी दावून ज्ञानाला 

टाकी स्तिमित करून 

कधी लावून कामाला 

टाकी हाडास मोडून॥३ 

मित्रपरिवार सुख 

देई भरभरूनिया 

ठेवी एकांति विरक्त 

मृत्यू खेळ दाऊनिया॥४

देई यश धनमान 

सुखे भौतिक भरून 

त्यात अपूर्णता पण 

देई हळूच पेरून ॥५

आत कळते मनाला 

खेळ निरर्थ चालला 

आस जागते अंतरी 

भेटण्याची शाश्वताला ॥६

🌾🌾🌾

© डॉ.विक्रांत प्रभाकर तिकोणे 

https://kavitesathikavita.blogspot.com 

☘☘☘☘☘ ..