कवितेसाठी कविता: संभाळतो दत्त

बुधवार, १५ जून, २०२२

***********

कारणा वाचून संभाळतो दत्त

ठेवतो सतत याद त्याची ॥१

आम्ही नच भक्त जाणतो ना भक्ती

साधनेची युक्ती कळेचिना ॥२

आवडतो दत्त तया प्रेमापोटी

गीत येई ओठी कधी काही ॥३

जगताचे प्रेम आहे या चितात

रूपा नि गुणात धावे मन ॥४

नका बाप करू संतात गणना

बहुत कामना मनात या ॥ ५

विक्रांता या लाज परी न तयाची

कशाला ढोंग्याची गादी वाहू॥६

मोहात देहात अनेक जन्मात

मज वाहू देत दत्तराया ॥७

तुज आळवतो कदा एकांतात

किती सुखा त्यात आहे सांगू ॥८

देह हा तुझाच मन हे तुझेच

जगणे तुझ्याच पायी दत्ता ॥ ९

बाकी घेणेदेणे काही चुकवणे

घडते कृपेने तव प्रभू ॥ १०

🌾🌾🌾

https://kavitesathikavita.blogspot.com

☘☘☘☘☘